Lafaek News—Kalen feruzen be besik naksobu nei-nei no bei-beik, laran metin ba Programa Nasional Dezenvolvimentu Suku ne’ebé hakerek ona faluk Maria Ulan nia naran iha lista boot PNDS nian iha ne’ebé lakon leet no laiha novidade .
Uma baraka be taka ho kalen, didin sira hamriik kleukan rasik, tan futu ho pregu la metin, laran tauk tebes ho anin fuik no udan, tuur hakmatek hanoin de’it ba nai maromak be iha leten as, mata-wen suli mes-mesak tan laiha maluk ida mai hakonu esperansa ba faluk oan kiak Maria Ulan.

Faluk Maria Ulan nia orijen husi rai-ketan Oe-kusse Ambeno, mai tuur iha Dili tanba kaben ho rai Dili, laen ne’ebé hanesan anju guarda ne’e fila hikas ba aman kadunan santa, husik hela faluk ho nia oan kiak nain tolu halerik iha uma barak be sikat an iha aldeia Lao-Rai suku Kuluhun postu administrasaun Kristu-Rei nian hodi moris hamutuk ho susar no terus nia laran.
Haree ba uma baraka be hamriik ho didin halis, faluk laran-metin tebes ba Programa Nasional Dezenvolvimentu Suku, ne’ebé alista tiha ona faluk Maria ho nia oan nain tolu tama ona iha livru PNDS nian atu harii hikas uma dignu ba faluk ho oan nain tolu, hein ba hein laiha novidade ida husi PNDS liu husi liman ain estadu nian be hanaran xefe povosaun Lao Rai Kuluhun.
“Uluk PNDS sira mai foti dadus hasai foto ba uma ne’e mai too agora laiha resposta ruma, novidade ida mos laiha,” faluk Maria Ulan halerik ba lafaek news iha Baraka okos Lao Rai Kuluhun foin lalais.
Faluk ho oan kiak nain tolu nia moris loro-loron, depende ba viziñu sira, sekarik presiza inan faluk halo servisu ruma hanesan fase ropa, no soru tais hafoin bele hetan osan dolar ida ka rua hodi hatutan netik sira nain haat nia moris.
Bainhira, labarik nain tolu nia aman husik hela sira, inan faluk ne’e dada iis la too, no deside hasai oan nain rua husi eskola no husik oan ida mak eskola iha ensinu Pre-Sekundária ho razaun kbiit laiha no la hetan osan loro-loron hanesan deputadu sira iha parlamentu nasional ne’ebé hetan preveléjiu boot haluha tiha povu kiik be moris susar no terus laran hanesan inan faluk Maria Ulan ho nia oan nain tolu hasoru da-daun.
Maibé, inan faluk nafatin iha esperansa boot ba governasaun dasia ne’ebé lidera ona husi Kay Rala Xanana Gusmão, faluk fiar sei hasai sira nain haat husi susar ne’ebé hanesan nakukun boot ida falun netik sira matan labele hateke no sente benefisiu husi independénsia ne’e.
“Ha’u husu ba governu foun atu bele tau matan hela mai ami faluk oan kiak ne’ebé moris halerik hela, husu ba ulun nain sira labele taka matan taka-tilun ba ami faluk no oan kiak nia halerik,” Faluk Maria espresa.
Inan faluk konta nia esperénsia moruk, nu’udar inan responsablidade ba moris la fasil, laiha servisu permanensia atu bele hakbiit moris no dudu oan sira ba eskola hodi bele hetan matenek diak aban bainrua bele servisu ba Timor, maibé buat hotu mosu hanesan mehi, presiza hisik kosar-wen no sai hanesan atan foin bele hetan netik etu bikan haat ba faluk ho oan nain tolu.
“Ha’u iha responsabilidade boot ba oan nain tolu, entaun Ha’u buka meius oi-oin hodi hetan aihan bikan tolu ba ha’u nia oan nain tolu, maibé ha’u nia kbi’it labele, Ha’u deside oan Feto boot labele eskola, oan mane ida mak eskola agora tuur ona iha ensinu pre- sekundariu no ida Kiik lori ba Oe-kusse hela ho nia avo hodi eskola.” Haktuir faluk Maria Ulan.
Uma ida hanesan barak toos-laran, Ho uma ne’ebé komesa lahuk, kalen sira komesa kuak, ai-rin uma nian lahuk ona, uma besik isin lolon nakdoko bainhira anin huu makas, uma laran aihan, laiha ema ruma vizita lori lian esperansa ba hasee netik faluk ho oan kiak nain tolu atu bele iha netik esperansa.
“Uluk PNDS sira mai foti dadus hasai foto ba uma ne mai too agora laiha resposta ruma Tamba ne’e Husu ba Governu foun atu bele tau matan hela mai ami faluk oan kiak ne’ebé Moris halerik hela iha husu ba Ulun nain sira tau labele taka matan taka tilun ba ami faluk no oan kiak nia halerik,” lian halerik faluk Maria.
Haree ba realidade moris faluk Maria ho nia oan nain tolu ne’e, xefe povosaun Lao-Rai suku Kuluhun, Alberto da Costa Xavier rekonese duni, ina faluk Maria ho nia oan nain tolu ne’e kbi’it laek duni, no hela duni iha fatin ne”e la hetan atensaun ruma husi estadu
Autoridade lokal ne”e mos rekomenda ba governu foun ne’ebé lidera husi Kay Rala Xanana Gusmão ne’ebé ho nia moto Xanana ba ema hotu, atu tau matan ba povu kbi’it laek sira ne’ebé halerik no presija tebes nai ulun sira nia tulun.
Jornalista : Mateus de Deus
Editor : Agapito de deus