Lafaek News—Defisiénsia tilun (la Rona) ho naran Martino Dias Marques, idade 31 hela iha Suku Tibar, polísia baku iha Tasi-Tolu hafoin ba sosa pulsa eletrisidade iha EDTL Kaikoli atu fila ba Tibar.
Defisiénsia tilun Martinho Dias Marques. imajen Acacio Pinto
Tuir kronolójia husi akontesimentu ne’e, iha loron kuarta (10/03/21), dadeer tuku 11 : 30, defisiénsia Martinho Dias Marques sai husi nia rezidénsia Tibar viajen ba Dili ho objetivu sosa pulsa eletrisidade, maibé husi Tibar tama Dili seguransa PNTL iha Tasi-Tolu konsege autoriza nia tama Dili, bainhira nia (defisiénsia) sosa tiha pulsa lori fila ba Tibar too iha Tasi-Tolu autoridade seguransa sira ne’ebé halo hela misaun seguransa nian la autoriza nia atu sai ba Tibar.
Ho nune’e, defisiénsia ne’e kumpre fila fali husi fatin chek point ba tuur iha uma tradionál Tasi-Tolu, nune’e too tuku 12, defisiénsia ne’e sente kabun hamlaha ona tenke ba lalais Tibar, hafoin ba too iha check point entrada Tasi-Tolu ne’e polísia sira bandu labele sai ba Tibar, maibé defisiénsia ne’e la rona saida mak seguransa sira ko’alia nune’e polísia konsege baku nia husi kotuk ho hirus matan hafoin husik defisiénsia ne’e liu ba Tibar, katak labele sai husi Dili, só tama mak bele.
“Ha’u ba sira tilan motor ha’u tama apita sira haruka ha’u liu ha’u fila mai husi Dili sira dehan ha’u labele liu, ha’u hatan ha’u nia uma iha Tibar tasi ibun ne’e, sira dehan ha’u fila ha’u ba tuur tiha uma adat tasi tolu, ba oras meudia ha’u hamlaha ona ha’u ba motor seluk sira fo liu, maibé ha’u la liu, ha’u husu tanba sa ha’u la liu, maibé polísia ida isin metan badak fuk tesi botak hasai ha’u nia xave motor, ha’u dehan ha’u sala saida? ha’u ko’alia hanesan ne’e ida baku ha’u husi kotuk, ha’u tun husi motor sira dehan o respeitu komanda ka lae? ha’u hatan komanda mak ne’ebé tanba imi farda hanesan ne’ebé ha’u la hatene, sira dehan komanda mak ko’alia ho ita ne’e, komandu dada ha’u husi kotuk mai baku ha’u nia hirus matan moras ha’u hakruk ha’u tanis sira dehan karaillu tama bele o sai labele, sira dehan ha’u hasai eletoral sira ba hakerek mak foin haruka ha’u fila uma, haktuir defisiénsia tilun Martinho Dias Marques ba jornalista Lafaek News iha suku Tibar, kinta (11/03/21).
Vítima ne’e haktuir tan katak, iha akontesimentu ne’e polísia sira dudu vítima ne’e ba iha kalen ninin hodi baku tanba tauk komunidade sira haree.
“Polísia sira baku ha’u sira tauk ema haree ha’u ne’e mak sira dudu ha’u ba area kalen ninin mak baku ha’u, momentu polísia baku ne’e so mana Polísia ain as mak dehan labele baku hanesan ne’e, entaun ha’u fila ha’u la pusa ha’u postin iha Facebook,” defisiénsia ne’e konta.
Tuir nia katak, husi akontesimentu polísia baku ne’e too ohin loron defisiénsia sente hirus matan moras nune’e la konsege ba tratamentu tanba dalan taka.
“Agora ha’u nia hirus matan sente moras, ha’u labele ba konsulta tanba ita sai ha’u tauk sira la fo fatin ha’u liu sira baku fali ha’u, entaun ha’u la ba konsulta, haktuir vítima ne’e.
Jornalista : Domingas Viana/Acacio Pinto
Editora : Nelya Barros
