Lafaek News—Komunidade iha aldeia Fatumea suku Tibar postu administrativu Bazartete munisípiu Likisá, Verónica Pereira ho nia kaben Leonardo Barboza ho lian halerik aihan uma laran no labele ba Dili sosa foos, tanba autoridade seguransa la autoriza ho razaun munisípiu Dili lockdown.
Polítika oitavu governu konstitusionál daualuk ida ne’e deside ho koletivu liu husi reuniaun Konsellu Ministru taka munisípiu Dili ho razaun númeru covid-19, aumenta bei-beik akontese tanba kauza husi movimentasaun illegal.
Maibé governu iha polítika ne’ebé adekuadu atu salva nia povu husi kazu covid-19, ne’ebé ohin loron iha mundu oho ema lubun hatudu iha dadus mundial konfirmadu : 118,723,992 Ativu : 21,776,826, rekupera : 94,313,201 no mate : 2,633,965, maibé iha Timor Leste ohin loron konfirmadu : 159, Ativu: 65, rekupera : 94 no mate zero.
Ho situasaun ne’e hamosu pániku mundiál hanesan mós iha Timor Leste, governu rasik esforsu haree tuir nasaun seluk ne’ebé implementa lockdown hodi salva nia populasaun husi moras covid-19, maibé hamlaha mós ameasa da-daun komunidade kiik sira iha Tibar labele tama Dili hodi sosa foos, tanba razaun lockdown.
Tuir deklarasaun konkreta husi komunidade Tibar, Verónica Pereira , ho lian triste tanba foos iha uma laran falta de’it kilu rua, no labele mai Dili atu sosa foos ho razaun autoridade seguransa ne’ebé destakadu iha entrada João Paullo II Tasi Tolu labele autoriza.
“Ami ba Dili, maibé polísia iha taka dalan iha Tasi Tolu dehan ami ba ami la fila ona tanba ne ami tauk la kohi ba ami mos tauk tama karantina, tanba ami oan sira hela iha uma,” dehan Verónica Pereira ba lafaek news iha Tibar, kinta (11/03/21).
Familia Leonardo ho Verónica nian hamutuk ema na’in ualu (8) hamutuk iha um ida, depende moris ho peskadór ikan, maibé sitasaun oras ne’e ikan laiha folin tanba ema laiha atu sosa.
“Ha’u nia katuas peskadór hetan ikan mos se mk atu mai sosa loron tolu ona ema la sosa ha’u nia katuas oan la ba tama tasi,” haktuir Verónica.
Verónica justifika katak ba da-daun foos ne’ebé tein ha’an lor-loron hela de’it kilu-2, ema na’in ulau kedan haan la too, bainhira mak Dili loke fali atu bele ba sosa foos.
“Ha’u nia laen n’udar peskadór ba buka ikan ba faan mos la diak tanba dalan iha Dili taka, agora ami nia fooss hela de’it kilo rua hanesan ne’e,” Verónica haktuir ho triste.
Jornalista : Domingas Viana /Acacio Pinto
Editora : Nelya Barros
