Lafaek News—Reitór Universidade da Paz, Adolmando Soares Amaral, afirma relasiona ho despaxu Konsellu Ministru aplika lockdown, governu presiza konfirma ho emprezáriu sira atu verífika armajen sira durante loron hitu nesesidade báziku sufisiente hodi bele atende nesesidade komunidade.
“Maibé governu presiza konfirma ho emprezáriu sira ne’ebé fornese nesesidade báziku hodi hare ba sira nia armazen, katak sufisiente ka lae nesesidade báziku ba semana ida hodi hatan ba komunidade nia presija,” hatuir Reitór Adolmando Soares Amaral, ba lafaek news iha nia kna’ar fatin UNPAZ foin lalais ne’e.
Lider UNPAZ ne’e akresenta, governu hasai desizaun lockdown iha munisípiu Dili, maibé tenke iha mós toleránsia ba asuntus ne’ebé importante hanesan, prosesu pagamentu, asina dokumentu balun tanba sei bele halo viajen maibé la vale ba ema hotu-hotu.
“Lockdown ne’e sei iha impaktu ba munisípiu sira seluk tanba sasan importasaun hotu-hotu mai sentraliza iha Dili mak foin distribui ba fali munisípiu sira seluk, por enkuantu Dili mak lockdown signifika katak distribuisaun ba minisípiu sira sei laiha durante semana ida,” dehan nia
Oras ne’e, minisípiu sira tenke depende de’it ba sira nia stock ne’ebé mak sira iha atu nun’e bele aguenta maibé se la iha maka entaun Governu presija fó fexlibilidade liuliu ba distribuisaun nesesidade báziku sira ba minisípiu sira.
“Ba desizaun lockdown ne’e iha pozitivu no negativu. Pozitivu mak iha ona kazu pozitivu covid-19 di’ak liu ita prevene, nia negativu mak ita Timor depende liu ba produtu importasaun tanba ita nia produtu lokál la sufisienta atu hatan ba kada uma kain loron nian,” tenik nia
Molok atu remata, reitór ne’e fundamenta, governu bele halo desizaun sira hanesan ne’e, maibé tenke iha responsabilidade morál atu nune’e povu ida ne’e labele sofre tan ba efeitu husi desizaun ne’ebé governu foti.
Jornalista : Felisberto da Costa Fernandes
editora : Nelya Barros
