Lafaek News—Negosiante Francisca Mafalda Freitas, idade 63 ne’ebé hala’o atividade negósiu iha ponte CPLP okos prontu kumpre no obedese serka sanitária maibé husu governu labele bandu atividade negósiu ba povu baibain.
“Governu sira taka dalan no ema lala’o ba mai, ha’u pasiénsia halo tuir regras hotu, más ami atu hamlaha ona, ami tenke buka tun buka sa’e husi fa’an sasan nune’e ha’u bele sosa netik hahan bikan ida ami han netik iha situasaun ida agora, tanba estadu atu tau matan mós ba ema barak la’os ita hamlaha ba tane liman de’it,” dehan negosiante Francisca Mafalda Freitas, ba lafaek news, iha Komoro ponte CPLP, sesta, (12/03/2021).
Hodi dehan, moris lor-loron depende ba atividade negósiu foin bele hetan osan, se governu bandu oinsá povu kiik sira bele hetan osan hodi sustenta moris iha situasaun covid-19.
“Ha’u iha uma de’it ne’e dala ruma hahan laiha, dala ruma mós buat barak maka falta iha uma laran, ne’ebé ha’u fa’an iha ne’e hanesan tur hela iha uma la la’o ba mai ida, satan iha sitasaun ida hanesan ne’e sasan la foin ida, maibé ami toman buka osan atu folin ka lae ne’e ami toman, ita tane liman ba estadu mós hanesan de’it,” nia subliña.
Nesesidade ne’ebé fa’an iha ponte CPLP nia okos hanesan pop mie, kafé, supermi, no etu inklui mós sasan sira seluk, maibé rendiementu diferensa tebes ho tempu ida uluk seidauk aplika estadu emerjénsia.
“Ema la’o-la’o hamrok ha’u halo kaffe kopu ida ema fó ha’u $0.25, uluk moras ne’e seidauk mosu loron ida ha’u hetan $10 ba leten, agora ema laiha ona atu sosa entaun loron ida ha’u hetan $5 mai karik, ho osan ne’e máka ha’u hola fali foos no modo ba han loron loron nian, se ita lahalo bele mate ba hamlaha,” tenik nia.
Negosiante haktuir, ema hotu tauk mate tanba pandemia Covid-19, kilat musan karik tiru mai tarutu ema sei bele halai hodi subar an, más ida ne’e halai mós la di’ak derrepente monu máka foin hakfodak.
Negosiante Francisca, hela iha mota sorin parte suku Madohi nian no dader-dader tuku 7 tutur husi mota laran mai iha pontes okos to’o lokraik tuku haat tutur ba fali uma hanesan loro-loron, durante tinan neen ona.
“Ha’u fa’an iha pontes okos ne’e tinan neen ona, tanba uluk foer ha’u máka dasa moos, sasan tutur de’it husi mota laran,” nia informa.
Negosiante ne’e husi munisípiu Ermera, postu-administrativu Atsabe, suku Atara, hela iha Dili durante tempu okupasaun Indonézia kedas, iha ne’ebé hela iha suku Madohi hodi hala’o atividade negósiu iha ponte CPLP okos.
Entretantu obervasaun jornalista Lafaek News nota katak komunidade ne’ebé hela besik ponte ladun halo movimentasaun no abitante ne’ebé piñeira rai-henek iha mota laran mós menus inklui negosiante sira maioria kumpre medidas prevensaun Covid-19.
Jornalista : Pedro de Almeida
Editora : Nelya Barros
