Ermera (Lafaek News)-Autoridade lokál iha Autoridade Munisípiu Ermera husu ba governu liuhosi Ministériu Administrasaun Estatál (MAE) atu halo rehabilitasaun ba sede suku sira iha Ermera, tanba ho kondisaun grave ona.
Xefe suku Railaku, Postu Administrativu Railaku, Vitor Boavida, afirma kondisaun sede suku sira iha Ermera kuaze ho kondisaun ne’ebé la permite ona atu utiliza halo atendimentu ba komunidade sira, tanba ne’e presiza halo reabilitasaun.
‘’Ministériu Administrasaun Estatál nia kompromisu atu halo reabilitasaun, maibé até agora sede suku sira ne’e aat nafatin,’’ informa Vitor liuhosi sesaun husu no hatán iha diálogu Prezidente Repúblika Francisco Guterres ‘Lú-Olo’ iha salaun parókia Gleno, Kinta (19/11/2020).
Tuir nia katak, sede suku sira ne’ebé daudaun ne’e utiliza ba atendimentu komunidade sira konstroi iha tempu naruk nia laran, tanba ne’e agora la merese ona utiliza tanba ne’e presiza duni halo rehabilitasaun.
Alende kondisaun sede suku, iha mós sede suku sira falta ekipamentu sira hanesan komputadór no printer sira atu bele fasilita autoridade lokál sira hodi atende ba komunidade sira iha baze.
‘’Tanba ekipamentu iha suku zero, ami hakerek uza ho liman, maibé dokumentu loloos ne’e mai hosi suku,’’ tenik nia.
Iha biban ne’e Vitor mós kestiona osan insentivu ba autoridade lokál sira, tanba delegadu no delegada sira fulan-neen foin bele simu $.45 dollar.
‘’Subsidiu sira ne’ebé fo ba xefe suku sira kada fulan $140 dollar, inklui delegadu no delegada sira fulan-neen mak manan $.45 dollar, ne’e tenke esplika ba ami,’’ katak nia.
Hatán ba kestaun ne’e, Ministru Administrasaun Estatál (MAE) Miguel Pereira, hatete governu tau ona iha planu OJE 2021 tanba ne’e bainhira OJE 2021 aprovadu governu sei halo rehabilitasaun ba sede suku sira iha territóriu laran tomak
‘’Probelama kona-ba ekipamentu iha suku sira ne’e governu kompromitidu atu reabilita, tanba konstrui iha tinan-2006, 13tanba ne’e sede suku sira presiza hadia ona, iha tinan oin osan aprovadu ita tenke hadi’a,’’ nia promete.
Governante ne’e mós kompromete katak, tinan ne’e governu sei hadia insentivu ba autoridade lokál sira atu bele manan osan kada fulan, maibé labele iha insentivu hansan agora daudaun.
‘’Ita tenke hadi’a insentivu ba lideransa komunitariu hotu, tanba ne’e kestaun delegadu no delega ba $45 dollar, maibé tinan ne’e ita sei rezolve, tanba kada-fulan sei simu $30 dollar kada fulan,’’ nia promete.
Jornalista : Lino Aparicio
Editór : Floriano Soares
