Ermera (Lafaek News)-Xefe Suku Eraulu, Postu Administrativu Letefoho, Autoridade Munisípiu Ermera, Domingus Madeira, hatete, folin kafé tuun hamis tebes vontade komunidade sira nian hodi hasa’e kuantidade ba plantasaun kafé iha Ermera.
“Ami-nia produtu ida ne’ebé koñesidu liu mak kafé, maibé ohin loron folin kafé tun demais, entaun povu labele aumenta plantasaun kafé, hasa’e kualiadede no kuantudade kafé,” dehan Xefe Suku Domingus Madeira liuhosi sesaun husu no hatán hafoin diálogu Prezidente Repúblika (PR) Francisco Guterres ‘Lú-Olo, iha Salaun Parókia Gleno, Kinta (19/11/2020).
Nia hatutan, tuir loloos komunidade sira kontinua hasa’e kuantidade no kualidade ba plantasaun kafé atu nune’e bele exsporta ba nasaun seluk inklui mós distribui ba munisípiu sira seluk, maibé kompñia sira ne’ebé sosa kafé kontinua hatuun kafé nia folin.
“Tanba ne’e ami husu ba governu atu bele hasa’e folin kafé atu nune’e povu bele garantia ninia kuantidade no kualidade kafé,” tenik nia.
Enkuantu tuir Xefe Suku Riheu, Felisberto Soares Madeira Ximenes, tuir plataforma dezenvolvimentu ne’ebé komunidade Ermera iha mak tinan-2021 hakarak rehabilita kafé kada suku ida ho ektare 37 atu nune’e bele bele hasa’e produtividade ne’ebé di’ak.
“Tanba ne’e ami husu ministériu relevante atu tau atensaun ba iha prosesu remanutensaun kafé, labele tinan tolu de’it, maibé tenke halo netik to’o tinan lima para kafé nia kualidade iha produsaun bele di’ak,” dehan nia.
Hatán ba preokupasaun ne’e, Minitru Agirikultura no Peskas, Pedro dos Reis, hateten governu labele tau folin kafé ho permanente tanba daudaun ne’e folin kafé bazeia parseiru internasionál.
“Ita hotu hatene kafé folin depende ba internasionál. Ita labele halo buat ida tanba ita nia produtividade seidauk to’o iha ne’ebá, maibé ita kontinua servisu maka’as atu oinsá hasa’e nia kuantidade no kualidade,” nia esplika.
Nia informa, husu ba komunidade sira atu labele lakon vontade, maibé pasiénsia nafatin hodi hasa’e kualidade no orgánika kafé, tanba úniku ida ne’e mak ita bele exporta kafé ba nassaun seluk.
Nune’e, Prezidente Repúblika (PR) Francisco Guterres ‘Lú-Olo’ motiva komunidade sira atu nafatin iha vontade hodi hasa’e produtividade kafe Ermera ho kualidade internasionál tanba kafé sai rikusoin importante ba Ermera.
“Presiza tebes ministru agrikultura tau kestaun atu oinsá mak ita salva nafatin ita nia rikusoin kafé Ermera nian ho kualidade internasionál,” dehan aman ba nasaun ne’e.
Jornalista : Lino Aparicio
Editór : Floriano Soares
