Lafaek News—Prezidente Autoridade Munisípiu (PAM) Bobonaru, Zeferino Soares dos Santos, afirma relasiona ho desizaun governu sentral deside taka (lockdown) munisípiu Bobonaru, nia parte prontu ezekuta servisu hodi prevene transmisaun lokál husi pandemia covid-19.
“Medidas ne’ebé governu foti ha’u hanoin ami autoridade lokal prontu ezekuta maske hasoru problema barak,”dehan Prezidente Autoridade Munisípiu Bobonaru Zeferino Soares do Santos ba Lafaek News iha kna’ar fatin, sesta (19/02/21).
Autoridade Bobonaru ne’e mós relata, Iha evidénsia ema kontinua tama ilegal mai Timor konsege to’o iha komunidade nia leet, komunidade sira tenke fó hatene ba siguransa hodi foti medidas tau karantina, tanba ema sira ne’ebé tama illegal iha prosesu halo teste rezultadu pozitivu covid-19.
Tanba ne’e, governu deside taka munisípiu Kovalima ho Bobonaru, tanba iha evidénsia maluk sira tama sai ilegal mai to’o komunidade nia leet governu deside taka munisípiu rua atu evita transmisaun lokal.
“kompañia sira ne’ebé fahe sesta bázika sira lori tiha sasan mai antes rezolusaun ne’e sai i dopis sira labele fila tanba dalan taka ona i estudante ne’ebé mai foti osan i prepara dokumentos atu ba rejistu fali sira labele ba no horseik ita hetan orientasaun husi ministru atu ema ida labele movimenta,” tenik nia
Jornalista : Zeferino Barreto Gomes
Editora : Nelya Barros
