Lafaek News -VIII governu kontituisionál lidera husi primeiru ministru Taur Matan Ruak propoin orsamentu 15 milões ba iha komferénsia episkopál

Primeiru Ministru Taur Matan Ruak hateten, asina akordu kona-ba subvensaun ne’ebé tinan-tinan dispoin tuir akordu konkordata ba iha konferénsia episkopal, ne’e duni tinan ida-ne’e primeira vez governu deside aumenta orsamentál ba 15 milõens tuir posibilidades ne’ebé governu iha atu finansia atividades ne’ebé planeadu tuir konferénsia episkopal nia planu.

“Ha’u hakarak hato’o agradese ba parseira ne’ebé di’ak ho konferénsia episkopal iha área oi-oin, hanesan área sosiál no kultural sobretudu iha área kombate Covid ne’ebé ita nia país prátikamente dezde tinan kotuk enfrenta pandemia ida-ne’e, maibé grasa a deus ita nia objetivu ne’ebé ita define ba ita nia rain to’o agora ita konsege, ne’e duni primeiru objetivu mak evita atu hetan óbitus ka ema mate, segundu mak evita kontaminasaun kontajen komunitáriu, objetivu terseiru ita define ba ita nia an atu halo esforsu katak bele kontrola kazu sira importávél hodi ajuda sira nia rekuperasaun atu nune’e labele avansa ba iha estájiu dezenvolvimentu sira seluk” informa Primeiru Ministru Taur Matan Ruak iha serimonia asina akordu subvensaun episkopál iha Palasiu Governu Dili, sesta (19/02/21).

Iha fatin hanesan Bispo Diocese Dili, Dom Virgilio do Carmo da Silva, argumenta, bazeia ba konkordata ne’ebé uma kreda santa sé ho governu iha, tinan-tinan fo biban atu govenu fo subvensaun ba uma kreda Timor entaun presiza iha asina akordu balun.

“Tuir lolos ohin ami na’in tolu mak marka prezensa iha ne’e maibé Dom Nolberto núdar Prezidente konferénsia episkopál laiha ne’e tanba husi Maliana Lockdown totál entaun ohin reprezenta ha’u hodi asina akordu ne’e” dehan Bispo Diocese Dili, Dom Virgilio do Carmo.

Arsebispo ne’e akresenta, orsamentu 15 milloens ne’e husi 50 porsentu sei aloka ba área edukasaun nian, 25 porsentu sei aloka ba servisu sosiais, 15 porsentu ba governa igreja no 10 porsentu ba administrasaun jestaun atividades igreja ninian, tanba marka kedas iha konkordata ninian ne’e entaun lao tuir buat ne’ebé iha.

Jornalista : Juvita dos Santos

Aisténsia Editór:Egidio Nono