Ermera (Lafaek News)-Alumni Parlamentu Foinsa’e (APFTL) hamutuk ho Oxfam Timor-Leste realiza espozisaun kona-ba Juventude Iha Agrikultura ho tema “Setór Produtivu iha Munisípiu Ermera, halibur grupu juventude sira ne’ebé partisipa iha setór agrikultura.
Hanesan hatuur ona iha konstituisaun RDTL define kona-ba obrigasaun Governu ba Juventude, Artigu-19 hosi konstituisaun RDTL versíkulu-1, Estadu foti no fó barani ba joven feto no mane, atu sira bele hako’ak metin unidade nasionál, bele harii fali, tuba no haburas nasaun ne’e. Versíkulu-2, Estadu sei halo buat hotu-hotu ne’ebe nia bele, atu tulun edukasaun, saúde, formasaun profisionál ba joven sira.
Rezultadu priliminares sensus 2015 hatudu katak maioria populsaun Timor-Leste mak juventude no sira hola parte subtansial tebes iha sosiedade nia laran. Joven ho tinan 15-24, nu’udar defini iha Polítika Nasional Juventude, ho númeru kuaze 21% husi totál populasaun tuir sensus tinan 2015 (ka ema nain1,167,242). Númeru ida ne’e signifikante tebetebes. Nu’udar nasaun ho maioria populsaun mak ho idade joven ne’e bele sai potensia ba dezenvolvimentu nasaun wainhira iha investimentu ne’ebe adekuadu ba sira.
Hosi totál populasaun Timor-Leste, 80% mak moris ho atividade agrikultura. Maske nune’e, seitór ne’e seidauk dezenvolve ho másimu. (data estatiska RDTL no Oxfam 2019,2)
Relatóriu Avaliasaun Agrikultura ne’ebé Oxfam publika ona iha Outubro 2019, iha rezultadu avaliasaun sita katak agrikultor ne’e hanesan “ema kiak sira nia profisaun”. Responde sira esplika katak joven sira iha interese ne’ebe menus tebes ba agrikultr, no sira nia inan-aman ninia serbisu nu’udar agrikultor ne’e ‘foer’ no ‘kolen’ hatudu katak joven sira ladun iha interese iha servisu agrikultura nian, no sira nia inan-aman ativamente enkoraja sira atu buka servisu diak, tanba servisu agrikultura ne’e “foer demais” no “servisu todan”. (Oxfam 2019)
Iha loron espozisaun Prezidente Alumni Parlamentu Foinsa’e Timor-Leste (APFTL), Zaulino Gomes iha abertura hateten liu hosi espozisaun ne’ebe organiza hosi APFTL ho Oxfam, hodi bele fo espasu ba joven agrikultura atu bele halakon tiha prespektiva publiku nian katak joven barukten maibe joven barak mak edukativu.
“Tanba ida ne’e APFTL servisu hamutuk ho Oxfam prinsipalmente eventu sira hanesan ne’e kria espasu atu fanun autoridade estadu sira atu fo kebijakan ka kria polítika liu-liu ba seitor produtivu sira, tanba seitor produtivu nudar seitor ne’ebe bele kontribui ba kria ekonomia familia, liu-liu hadia ekonomia nasaun nian,” infroma Prezidente APFTL, foin lalais ne’e iha Munisípiu Ermera, Gleno.
Nune’e, Minístru Turízmu, Komérsiu no Indústria (MTCI), José Lucas do Carmo da Silva, hatete, MTCI kongtrula grupu joven sira, liu-liu APFTL sira ne’ebe lori grupu joven sira atu hatudu mai governu, produtu ne’ebe joven sira halo ona liu hosi seitor agrikultura.
“Imi hatudu mai ami saida mak imi produs ona, liu-hosi espozisaun imi hatudu rezultadu ne’ebe iha ona. Governu fó parabens ba joven sira ne’ebe kreativu no halo servisu inovatívu. Nune’e ita sei tur hamutuk hodi hare polítika saida mak governu bele halo ba área produtivu. Área agrikultura laos tutela ba ministériu ida deit, maibe interministerial mos iha hola parte iha seitor ida ne’e. Alin sira bele halo buat ruma hosi munisípiu maibe laiha koneksaun ne’ebe boot, ho oportunidade ohin ne’e tulun tebes grupu joven sira iha seitor produtívu, no ami lubuk ida mak sei halo servisu ho ita boot sira. VIII Governu Konstituisional fó importansia boot ba juventude sira liu-hosi fundus no programa lubuk ida, hodi responde ba juventude sira nia preokupasaun,” nia deklara.
Sekretáriu Estadu Juventude no Desportu (SEJD), Abrão Nokosiku Saldanha agradese ba APFTL no Oxfam ne’ebe kria espasu ba joven sira bele dada lia ho guvernante sira atu buka dalan ba sira atu kria sira nia moris,”eventu hanesan ne’e mós fo oportunidade ba investor sira ka kompradores sira atu nune’e bele hare inisiativa joven sira nian hodi bele hasa’e no dezemvolve sira nia moris rasik”, dehan Sekretáriu Estadu Abrão Saldanha.
Guvernante ne’e hatete husi espozisaun refere hatudu ona prova katak joven barak iha poténsia, joven sira bele halo, bainhira polítiku ou guvernu bele kria kondisoes no espasu.
“Joven sira, saida mak SEJD atu halo? baze ba referensia sira mak estimulu joven sira iha área produtívu emprendedorismo sosial, sei hahu no atu espanda hanesan agora dadaun iha ita nia oin ne’e, prefere ba 126 sukus, atu oinsa estimula joven sira atu fila ba kampu,” tenik guvernante ne’e.
Abrão Nokosiku Saldanha, hatete, oportunidade servisu hanesan agrikultura, pekuaria, peskas, turísmu no mós konservasaun ambiental ne’e bele hahu husi suku sira. Nu’udar Abrão Saldanha, joven barak mak eskola ho hanoin ida katak aban-bainrua ba hotu servisu iha office, hotu-hotu hakarak funsionáriu públiku, maibe servisu mós mai husi setór produtívu ne’ebé sei kria servisu ba ema ida-idak, ezemplu ida mak kafe organiku Atsabe ne’ebé kria husi joven Ameta fo ona servisu ba nia maluk joven sira hamutuk 125 pesoas ho idade 28 anos no nia exporta kafé organiku Atsabe ne’e ba nasaun Europa inklui nasaun sira iha asia pasífiku.
Country Diretor Oxfam Timor-Leste, Fausto Belo Ximenes hateten kontente ho inisiativa hosi APFTL hodi realiza espozisaun juventude no agrikultura.
“Oxfam nian papel iha Timor-Leste mak servisu ho governu, komunidade, sosiedade sivíl, no gurupu sira inklui grupu juventude sira no plataforma diálogu ida ne’ebe diak hodi liga ita nia grupu joven sira ho nain-ulun sira, hodi hatoo sira nian dezafius ne’ebe sira infrenta no joven sira nia potensialidade hodi kontribui ba seitór produtívu sira. Timor-Leste nu’udar nasaun ne’ebe ninia populasaun joven bo’ot tebes, ne’e poténsia ida diak tebes. Rekursu ida ne’e importante tebes ho polítika ne’ebe diak hodi utiliza sira nia enerjia ne’ebe boot, sira nia abilidade no kreatividade hodi kontribui ba prosesu dezenvolvementu ita nia nasaun,” dehan Fausto.
Liu-hosi espozisaun ne’e sei fahe informasaun importante kona-ba diversifikasaun ekonomia ba juventude sira, joven sira bele hatudu kreatividade ne’ebe inovatívu ba governu no bele sai inspiradór ba joven sira seluk, atu partisipa iha diversikafasaun ekonomia.
Objetívu prinsipál hosi expozisaun ne’e rasik mós atu hatudu ba joven sira katak servisu agrikultura nu’udar seitór importante ida, presiza tebes abilidade joven sira nian ne’ebe kreatívu atu bele dezenvolve no haburas liutan seitór agrikultura hodi nune’e halakon dependensia ba fundu petrolifeiru deit. Partisipasaun joven iha agrikultura mós bele influensia governu nia polítika atu fó importansia ba papel juventude nian iha dezenvolvementu ekonomia rai laran.
Partisipante Total partisipante ne’ebe partisipa iha espozisaun juventude no agrikultra hamutuk 149, kompostu hosi Feto nain 54 no mane nain 94. Sira ne’ebe partisipa mai hosi grupu juventude hamutuk 12 ne’ebe halo aktividade iha área oioin inklui hortikultura, pekuariu, aguakultura, turísmu no ambiente. Expozisaun ne’e halao iha Gleno munisipiu Ermera iha loron 4 Marsu 2021 durante loron ida tomak inklui vizita ba fatin aktividade produsaun hanesan Inisiativa Dezenvolvimentu Ortikultura Rural (IDOR), Timor-Leste Organic Fertilizer (TILOFE) no Ermera Aikulat Mutin Organiku (EAMO).
Programa ne’e hetan apoiu finanseiru hosi governu Australia liu, husi Governance for Development (G4D) no no serbisu ho Oxfam Timor-Leste no Alumni Parlamentu Foinsa’e (APFTL). Mídi Oxfam
