Lautém (Lafaek News)-Pesoál Saúde sira iha munisípiu Lautém indentifika funsioáriu Sekretáriu Estadu Formasaun Profisionál Empregu (SEFOPE) ne’ebé halo kontaktu direita ho pesoál ne’ebé mak pozitivu iha nasionál.

Tuir informasaun ne’ebé lafaek News hetan iha area bemoris suku Fuiloru, postu administrativu Lospalos, munisípiu Lautém, katak iha funsionáriu SEFOPE ida ne’ebé halo servisu iha Dili no konsege halo kontaktu ka konversa direita ho funsionáriu ida ne’ebé pozitivu covid-19 iha Dili iha semana kotuk no funsionáriu ne’e fila husi Dili mai lautém horiseik 7/03/2021.

 “Ami nain rua konsege hasoru malu, maibé la kaer liman, ami rua konsege konversa duni, maibé ha’u mai to’o Lautém iha domingo no ohin ha’u ba servisu fatin mak ha’u rona mana ne’e pozitivu Covid-19, ha’u mós hakfodak, ha’u to mai Lautém ha’u sedauk halo kontaktu ho ema barak ida, ha’u liu duni husi Iraunu com nian, maibé ha’u hasoru de’it mak maun sira no ha’u mai liu Lospalos, ohin ha’u ba kantor no sai servisu ha’u mai liu uma, seidauk ba fatin seluk iha Lospalos vila ida,” deklara Funsionáriu ne’ebé halo kontaktu ho pasiente Covid-19 iha Dili ba Lafaek News liu husi via telefone, Segunda ohin.

Nia haktuir, hanesan Timor-óan prontu nafatin kolabora ho pesoál saúde sira hodi hasai teste.

Nune’e mós, Lafaek News kontinua kontaktu liu husu via telefone ho Doutór Mericio Castelo hanesan mós responsavel Covid-19 iha Munisípiu Lautém informa, ohin ami ba foti ona dadaus iha pesoal ne’e nia uma, aban dader ami ba foti nia sampel sei lori ba laboratorium mak bele konfirma, bazeia ba deklarasaun ne’ebé pessoal ne’e fó ba médiku sira katak, nia iha kontaktu duni ho pesoal iha Dili ne’ebé hetan pozitivu Covid-19.

Jornalista : C. M. Lautém

Editór        : Floriano Soares