Lafaek News—Sekretáriu Estadu Koopertaiva (SEKooP), Elizario Ferreira, afirma nia parte konsidera partisipasaun feto iha atividade efetivu no di’ak liu mane.
SEKoop Elizario Ferreira hatoo asuntu ne’e iha serimónia komemorasaun loron feto ne’ebé organiza iha nivel nasionál no Internasionál hamutuk ho feto kooperativa hodi ko’alia dezenvolvimentu kooperativa.
“Ko’alia kona-ba dezenvolvimentu kooperativa nian progresu feto sira nia partisipasaun di’ak liu mane sira, tanba atividade liña kreditu feto nian di’ak liu kompara ho mane sira husi lideransa ho jestaun mós feto sira di’ak liu kompara ho mane,” dehan sekoop) Elizario Ferreira ba Jornalista iha Salaun Sekoop Akait, Segunda, (8/3/2021).
Elizario esplika, tuir estatístika feto nia partisipasaun no kontiribuisuan iha atividade kooperativa as liu kompara ho mane, tanba prezensa feto ho mane iha porsentu 50, ne’ebé hanesan hodi kontribui liu ba dezenvolvimentu kooperativa.
“Ba oin hodi hare’e futuru di’ak ba feto sira oinsá atu hare’e kondisaun feto no partisipasaun politiku feto sira nian iha vida ekonómiku atu nune’e feto mós bele hola papel importante hodi kontribui ba dezenvolvimentu ekonómia nasaun nian,” tenik Elizario.
Iha nivel internasionál organiza husi ASEAN Confederation Credit Union, ne’ebé partisipa husi dirijentes kooperativa hanesan reperzenta feto hotu iha Timor partisipa iha eventu ne’e, inklui iha nivel nasionál komemora hodi fó onra no gloria ba feto sira ne’ebé husik sira nia vida ba indepedénsia.
Iha fatin hanesan Diretór Jerál Sekretariu Estadu Igualdade no Inkluzaun (SEII), Armando da Costa, reforsa loron 8 de marsu mundu selebra loron Internasionál feto no Timor mós selebra loron internasionál feto, ne’ebé organiza husi SEkooP hodi motiva feto sira iha área kooperativa.
“Atividade espesífiku ida mak reuniaun ho membru kooperativa feto sira iha Timor-Leste no mós sira ne’ebé iha rejiaun ASEAN, eventu ne’e no kapas tebes atu motiva ita nia inan feton sira liu-liu iha liña kooperativa nian hodi bele desenvolve di’ak liu tan no bele atrai sira nia feto maluk sira hodi partisipa iha vida Kooperativa,” hatete Diretór SEII ne’e.
Polítika SEII nian klaru atu dezenvolve espesifikamente iha sósiu-ekonómiku feto sira no grupu seluk iha área rural
“Ami fó apoiu atividade sira iha negosiu ekonómia nian la’os SEII de’it, maibé iha mós instituisaun seluk hanesan SEkooP no Seluk tan,” katak nia.
iha okaziaun ne’e Presidente Kooperativa Lakon Nakukun Mosu Naroman (LANAMONA), Domingas dos Santos, reprezenta feto hato’o sentimentu orgullu tanba SEKooP komemora loron Internasionál Feto, feto nia servisu dupla tanba responsabilidade familia no servidór públiku no nia parte husu governu merese duni atu hasa’e saláriu ba feto sira.
“Husu ba governu atu tau Konsiderasaun aas ba feto sira no rekoñese papel feto nian ho servisu ne’ebé máka iha tenki iha salario ne’ebé mak sufisiente ba feto sira atu bele servisu professionál no hasa’e tan sira nia kreativu iha sira nia servisu públiku ka iha instituisaun sosiedade sivil tenki iha rekoñesimentu ba papel feto nian,” nia sujere.
Jornalista : Rita Moniz
Asisten Editór : Pedro de Almeida
