Lafaek News—Reprezentante juventude Balibo Angelino dos Santos sujere PERMATIL atu loke filmajen kona-ba konservasaun bee debu atu bele sai referénsia ba komunidade oinsá bele iha koñesimentu konservasaun debu iha ida-idak nia suku rasik.
Imajen ne’e komunidade sira kee hela rai kuak hodi konserva bee debu iha tempu uda. Foto PERMATIL.
“Ami husu ba (PERMATIL) loke filmajen ida hodi joven sira haree sira bele komprende di’ak atu nune’e ba futuru sira mos tau importánsia ba konserva bee ida iha sira nia aldeia rasik,”hateten Angelino ba jornalista Lafaek News, iha aldeia Leohitu,” iha loron 24/11/2020.
Konservasaun kria bee debu hodi fornese bee matan iha suku (6) hanesan iha suku Leolima, Leohitu, Kowa, Saniri, Balibo Vila, inklui Batugade, maibé durante loron rua (PERMATIL) hahú dahuluk observasaun ba suku (2), Leohitu ho Leolima hafoin ba iha suku seluk.
Angelino do Santos, nu’udar membru prinsipál ba konservasaun bee debu ne’e, haktuir, iha kriasaun debu ne’e hasoru problema oi-oin, tanba joven barak mak menus ba informasaun oinsá mak konserva bee.
Reprezentante juventude husi membru konservasaun bee debu ne’e fundamenta liután katak, konservasaun debu ne’e di’ak, tanba bele kuda bee atu utilizasaun iha jerasaun tuir mai labele halerik ba bee moos.
“Konservasaun ne’e di’ak tanba ita kuda bee hodi ba futuru ita nian laos kuda bee ba matebian sira,tanba ita hare ba komunidade Barak mak hakilar ba bee tanba nee sei ita la tau Importansia ba bee ba futuru ita sei hamlaha hamrok ba bee,” katak nia.
Tuir nia, durante ne’e sira kria ona bee debu hodi fornese bee matan iha suku neen (6). Kompostu husi Leolima aldeia Raifatuk, hala’o reabilitasaun debu 1 travasaun 2, iha suku Leohitu aldeia Faluai halo debu foun 1, iha suku Kowa aldeia Laleis kria debu 1, Suku Saniri aldeia Subalesu hala’o travasaun 5, suku Balibo Villa aldeia Fatuleti kria debu foun 1, iha suku Batugade aldeia Batugade kria debu foun 1.
Iha sorin seluk Elvia Taibetun Pereira husi suku Leolima afirma, nia parte apresia tebes PERMATIL, tanba bele ba too iha sira nia suku hodi observa diretamente ba debu ne’ebé komumidade sira kria ona seidauk hetan nia rezultadu.
“Ba feto maluk sira katak labele halimar de’it iha uma tenke lao sai ba haree atividade saida mak joven feto seluk halo,” nia hakotu.
Jornalista : Etelvina Sarmento
Editora : Nelya Barros
