Bobonaru-Lafaek News—Akontese rai halai Iha loron 5 fulan fevereiru 2021, iha area sibilaun aldeia Soilesu, suku Soilesu, postu administrativu Bobonaru, munisíipiu Bobonaru, rezultad uma ka’in 10 estragus inklui toos hektares 50 mout ba rai okos.
Xefe suku Soilesu Norberto M. Simão, informa dezastre naturais ne’e grave tebes tanba afeta komunidade nia plantasaun iha to’os kuaze hektares 50, totál uma kain 10 hetan estragus, no estraga diresaun Bobonaru, posibilidade erozaun ne’e sei lapara bainhira udan kontinua volume boot.
“Ohin ami lideransa komunitáriu mai diretamente iha fatin akontesimentu ne’e atu haree no foti dadus, nune’e aban ami bele aprezenta ba postu administrativu no sei hatutan tan to’o munisipiu, ami fiar katak akontesimentu ne’e emerjénsia entaun ami presiza apoiu emerjénsia husi ministériu relevante tanba komunidade afetadus susar tebes ba hela fatin no aihan” informa Xefi Suku Soilesu ba Media Roman Suku, sesta (05/02/21), iha fatin akontesimentu rai halai iha Sibilaun Soilesu postu administrativu Bobonaru.
Iha fatin hanesan estensionista suku Soilesu Alberto Pereira Victór akresenta, iha fulan ida ne’e akontese udan no anin bo’ot hamosu dezastre naturais rai halai, fo impaktu ba agrikultura nia produsaun iha to’os no ai-horis hanesan holtikultura no floresta.
“Neduni ami husu ba Ministériu Agrikultura atu toma atensaun ba problema refere,” katak estensionista ne’e.
Iha sorin seluk vítima ba dezastre naturais ne’e, Saturdino Soares, relata relasiona ho akontesimentu ne’e rezulta sasán uma laran la aproveita au salva, tanba mosu rai halai derrepente.
“Ha’u nia uma laran rahun no ha’u nia aihan iha to’os hanesan ai-farina, batar no seluk tan la aproveita, ida ne’e mak triste bo’ot ida mai ha’u ho ha’u nia ferik oan no oan nain hitu atu ba loos ne’ebé,” hakotu Nia
Kontribuitór : media Roman Suku
Editora : Nelya Barros
