Lafaek News—Programa Outreach Asia Justice and Right (AJAR), Inocencio de Jesus Xavier, afirma envolvimentu labarik iha kampaña polítika, sosiedade sivil konsideira ne’e hanesan problema klásiku ida ne’ebé la’o laiha mudansa, partidu sira laiha komitmentu kria plantaforma ikus mai viola rasik plantaforma.
Inocencio hatoo asuntu ne’e relasiona iha loron 22 fulan Abríl partidu númeru sorteiu 11 ne’ebé halo kampaña iha munisípiu Manufahi komisaun Nasionál eleisaun (CNE) identifika labarik sira envolve iha kampaña refere.
“Envolvimentu labarik iha kampaña polítika, problema ida ne’e ami konsidera hanesan problema klásiku ida ne’ebé la’o maibé laiha mudansa, partidu sira laiha komitmentu tanba sira kria plantaforma ikus mai sira rasik viola plantaforma serake sira asina plantaforma ne’e ho sentidu ka lae, tanba sira asina plantaforma oin seluk maibé iha implementasaun oin seluk”, katak programa Outreach Asia justice and Rights ( AJAR) Inocencio de Jesus Xavier ba jornalista iha nia kna’ar fatin Farol, segunda (24/04/2023).
Parte sosiedade sivil halo monitorizasaun haree ona foto ne’e no manda ona foto ne’e ba Institutu Nasionál Defeza Direitu das Criansas (INDICA), atu hare espesifikamente ba asuntu ne’e hakerek karta ba dirijente partidu polítika sira hodi hola medida, nune’e iha loron tuir mai labele akontese envolvimentu labarik sira iha kampaña polítika, sa tan uza atributu partidu.
“Ha’u manda ona mensajén privadu ba Komisariu INDICA atu asaun no hola medida ruma ita hein”, katak Inocencio.
AJAR rekomenda mos ba CNE tenke halo relatóriu tanba CNE mak superviziona atividades kampaña, tenke sériu hakerek karta ba infrasaun ne’ebé komete husi partidu poliku sira hotu, tantu partidu ki’ik ka partidu boot sira mak komete,tanba lei ne’e ba ema hotu.
“Ita husu ba partidu polítiku hotu atu responsavel liu-liu ba partidu hirak ne’ebé komete infrasaun ne’e atu muda imi nia polítika no aviza ba kuadrus militantes sira bainhira ba kampaña labele envolve labarik sira no sidadaun hotu -hotu,inan manan mak envolve iha partidu labele fo kamiza no Bandeira ba ita nia oan sira ida ne’e mak asaun ne’ebé sosiedade sivil halo,” nia hakotu.
Jornalista : Rita Moniz
Editór : Agapito de Deus
