Lafaek News—Asosiasaun Emprejáriu Juventude Chineza (AEJC), servisu hamutuk ho Grupu Mama bolu apoiu material konstrusaun ba ALPA Bataleaun Orden Públiku (BOP), COP A, hodi halo reabilitasaun barajen inklui fatin ne’ebé kondisaun aat.
Tuir koordenadór AEJC, Rudy Kwan informa, durante ne’e asosiasaun la’o bei-beik ho grupu mama bolu foin lalais ko’alia ho Vise Ministériu Interior (MI) atu hadia fatin Alpa Bataleaun Orden Publiku (BOP), COP.A, tanba dadaun ne’e sira nia fatin balun aat iha tempu naruk, maibé to’o agora seidauk hadia.
“Inisiativa ida ne’e ami husi ami nia grupu rasik atu koopera malu entre grupu AEJC ho Mama Bolu servisu hamutuk hodi apoiu Alpa BOP. COP.A atu sira bele halo reabilitasaun ba fatin ne’ebe mak kondisaun aat ona,” dehan Koordenador AEJC Rudy liu husi nia diskursu iha edifisiu Alpa BOP COP.A kaikoli Dili, domingu (01/08/2021).
Iha fatin hanesan Komandante Unidade Espesial Polísia (UEP), Superintendente Xefe Orlando Gomes relata, fatin kompañia Alpa BOP durante okupa husi fulan janeru to’o ohin loron, fatin balun kondisaun di’ak no balun kondisaun aat, hanesan barajen aat deste uluk to’o agora seidauk hadia, tanba buat sira ne’e presiza orsamentu entaun sira seidauk bele hadia.
“Ohin ita nia asosiasaun Empreza Juventude Chineza hamutuk ho Grupu Mama Bolu fó apoiu ekipamentus konstrusaun mai ami atu rehabilita barajen ne’ebe mak kondisaun aat hela durante iha tempu naruk nia laran,” Komandante UEP Orlando esplika.
Nia afirma, Parseria ho AEJC no Grupu Mama Bolu la’os to’o ba ne’e de’it, maibé sira nia amizade parseira kontinua ba oin tan ne’e la’os de’it sira mesak mak apoiu material maibé kompleta malu.
“Ita mós sei apoiu sira nune’e ita bele dezemvolve kompaña Alpa BOP, maibé esforsu sira ne’e mai husi ita nia Vise Ministru Interior (Antonio Armindo) no karik buat ruma sei falta ami sei hato’o ba AEJC atu ita nafatin apoiu malu iha situasaun fasil no difisil nia laran,” nia rekomenda.
Nune’e mós husi Alpa Bop nafatin hato’o agradesimentu ba parseiru ne’ebé fó ona apoiu material konstrusaun rehabilitasaun barajen no mós la haluha hatoo agradese ba media sira nia partisipasaun iha serimonia entrega material konstrusaun ne’e.
Jornalista :Orlando Magno
Asisten editor : Pedro de Almeida
