Lafaek News—Polísia Komunitáriu (POLKOM) nasionál hamutuk ho Polísia Komunitáriu (POLKOM) munisípiu Dili Kontinua halo sensibilizasaun ba komunidade sira ligadu ho kazu pozitivu COVID-19 ne’ebé kontinua aumenta kada loron iha Timor-Leste.
Xefe Departamentu Polísia Komunitariu Nasionál, Superintendente, Antonio Da Luz informa, Polísia Komunitariu nafatin hala’o atividade sensivilizasaun iha fatin publiku no merkadu sira hodi esplika nafatin kona-ba regras Organizasaun Mundial Saude (OMS), nian atu prevene surtu COVID-19 iha rai laran.
“Ohin ami halo sensibilizasaun hamutuk ho Polísia Komunitáriu (POLKOM) munisípiu Dili, identifika ona komunidade balun too agora seidauk kumpri regras OMS ho MS nian, liu-liu la uza maskra, tanba ne’e ami prepara kedas maskara atu fo ba ema ne’ebé la uza maskra nune’e sira bele uza fali atu mantein ho regras ne’ebé iha ona,” afirma Xefe Departamentu POLKOM Nasionál, superintendente, Antonio da Luz ba jornalista iha sentru formasaun Korea Bekora, segunda semana ne’e.
Xefe Departamentu POLKOM Nasionál Antonio deklara, Nia mos koalia ona ba responsavel ba sentru formasaun Korea nian atu nafatin halo tuir regras OMS nian ne’ebé fo sai ona.
Entretantu Superintendente Antonio de Luz husu nafatin ba komunidade sira atu nafatin uza maskra, distansia sosial no fase liman beibeik atu korente COVID-19 iha Timor-Leste kotu lalais, Nunee mos ba oin POLKOM sei kontinua nafatin halo sensivilizasaun ba komunidade sira oinsa atu prevene aan husi surtu COVID-19.
Jornalista : Orlando Magno
Editor : Agapito de Deus
