Lafaek News—Moris ne’e labele depende de’it ba ema seluk hodi hadi’a moris, maibé presiza aprende hodi kria kampu servisu ba an rasik hodi sustenta nesesidade loron-loron, tanba servisu ne’e la refere de’it ba ema ne’ebé tur iha governu ka fatin seluk, maibé bele mós loke kampu traballau rasik ba ita-an rasik liuhusi meius oioin.
Situasaun ne’e akontese ba, Efragia Fatima da Costa, hela iha aldeia Nahaek, Suku, Dare, postu administrativu Vera-Krus, munisípiu Dili, hanesan negosiante ida ne’ebé ho inisiativa kria rasik kampu servisu, durante tinan haat (4)ona moris ho faan i-funan ho objetivu atu responde nesesidade uma laran no selu oan sira nia eskola
“Ita na’in kria kampu servisu di’ak liu duke ema seluk mak kria ba ita, Osan ne’ebé ha’u hetan husi faan ai-funan ne’e uza ba nesesidade uma laran no rai balu hodi selu oan sira nia eskola inkluí mós rai ba uma lisan nian tanba ita Timor ne’e ema ida-idak iha nia tradisaun rasik,” dehan Negosiante Efragia ba Lafaek News iha Nahaek Dili, foin lalais ne’e
Nia esplika, durante tinan 4 ona nia faan ai-funan tanba ho inisiativa rasik hakarak faan ai-fuan iha Nahaek, suku Dare maibé nia sosa de’it no balu troka ho kolega sira halo barak mak kuda hodi faan fali pot ida folin kiik liu mak $.5 no maximu $.20
“Karik ema la sosa ai-funan, ne’e konsikuénsia ita nian, tanba ida-ne’e hatudu realidade mai ha’u entaun tenke simu realidade maibé ami nafatin iha vontade tanba ohin la sosa ha’u garante aban ne’e ema tenke sosa fali,” nia deklara.
Nia konta, agora estadu implementa hela medida Serka Sanitária iha Dili, entaun ema la bele sosa ai-funan, durante ne’e ema mai sosa ai-funan ne’e menus maibé antes ne’e kada semana nia sempre hetan osan dolar atus ida resin.
Entretantu Negosiante Efragia Fátima da Costa iha oan hamutuk na’in neen(6) ida eskola iha universidade, na’in rua sekundáriu no na’in, no oan na’in tolu (6) seluk agora foin iha nivél Ensinu Báziku (SMP).
Jornalista :Orlando Magno
Asisten editor: Egidio Nono
