Lafaek News—Reprezentante Autoridade Lokal postu administrativu Maubisse munisípiu Ainaru, Wilson Nivio Maria Pereira Mendonça hatoo agradese ba Oxfam Timor Leste, Asosiasaun Jornalista Timor Leste, inklui Assosiasaun Parlamentu Foin sa’e Timor Leste, Mata Dalan Institue, Timor Leste organic fertelizer TILOFE, Emera Ai-kulat mutin Orgániku, Forum Juventude Difesensia Timor Leste, ne’ebé partisipa iha espozisaun Rabilau Maubise hodi komemra loron Juventude mundial nian iha 12 de Agostu 2025.
Xefe Suku Maubisse ne’e hateten ho espozisaun Rabilau bele promove mos fatin turizmu ida ne’e no tulun Joven produtivu sira iha area Maubisse inklui munisípiu 12 ho RAEOA.
“Imi nia prezensa sai parte ida ne’ebe bele apoia ami hodi hadia diak liu tan sitiu turístiku Rabilau ba iha future, kontribui hanoin ruma ne’ebe bele husik hela iha fatin ida ne’e, nune’e ami komunidade Maubisse no Rabilau ba Governu hodi servisu hamutuk atu hadia diak liután sítiu turístiku Rabilau,” xefe suku Maubisse afirma.
Autoridade ne’e fiar ho eventu ida ne’e sei liután motiva juventude sira liu-liu juventude kreativu ho inisiativa diak bele hamosu inovasaun oioin atu hasa’e sira nia vontade hodi kontinua realiza matenek ne’ebé sira iha.
Entertantu Membru APFTL Deviana Sarmento mos afirma objetivu hili Rabilau hodi hala’o espozisaun tanba Rabilau sai hanesan fatin turizmu no promove Juventude sira liu-husi eventu istóriku ne’e.
“Hili fatin ida ne’e atu organiza tanba, ita hateke fatin ne’e hanesan fatin potensial atu kontinua promove laos deit iha munisípiu maibe ita hakarak promove ba mundu katak ita moos iha fatin ne’ebe furak.Ita mos selebra loron juventude mundiál iha ne’ebe mundu hotu-hotu selebra iha loron aban (12/08), ita moos sei iha atividade barak ne’ebe sei realiza n Agradese ba lisan husi fatin ne’e, Lia-nain, komunidade ne’ebe simu ona ami iha fatin ida ne’e hodi ita bele realiza ita nia atividade, atividade ne’e ita nian maske ita mai husi munisípiu ne’ebe diferente, maibe agora iha ne’e ita Maubisse oan. Espera liu husi seremonia ida ne’e ita bele hetan matak malirin, nune’e ita nia atividade bele lao ho diak”
Nune mos, Jestor Peskija no Influénsia OXFAM, Adilson da Costa Junior haktuir, espozisaun ida ne’e bele mos reforsa agrikultor sira iha Rabilau Maubisse no Juventude hodi hatudu ba mundu katak Timor mos iha poténsia oin-oin.
“Ami hanoin katak ita tenke kontinua diversifika potensia ne’ebe ita iha, hanesan parte ida ne’ebe bele promove ita nia potensia turistiku no agrikultor iha Maubisse liu-liu iha Rabilau, Ida ne’e sai oportunidade ida atu bele ajuda ita nia komunidade, agrikultor no ita nia joven sira iha ne’e atu kontinua promove katak Timor mos iha potensia oioin laos deit iha Tutuala, Atauro no iha munisípiu sira seluk”nia esplika
Entretantu, 12 de Agusto 2025, núdar loron juventude mundiál mundu tomak selebra, oportunidade ida ne’e atu kria espasu hodi organiza diálogu entre joven kreativu, foinsa’e agrikultor katak la’os kria problema de’it, maibe iha potensia no koñesimentu ne’ebe bele fahe ho polítika no governante sira.
Jornalista : Maria José de Jesus
