Lafaek News—Centro Nasional Chega (CNC!.I.P), tersa (30/07/2024), fasilita formasaun dahuluk ba dosentes universidade hirak iha Timor kona-ba istória, direitus umanus, edukasaun ba paz no justisa tranzitoria.
“Formasaun ida ne’e nudar etapa primeiru ne’ebé CNC hala’o elaborasaun ba iha kurríkulu ba ensino superior ba matéria haat (4) História, Direitus humanus, edukasaun da paz no justisa tranzitoria ensino superior sira liu-liu hanesan universitário iha Timor maioria seidauk iha materia história, parsial ne’ebé sentro CHEGA ho MESC husu ba sentro CHEGA atu bele elabora kuríkulu ida ne’e hetan ona apresiasaun husi ministru,” Diretór nasional CNC, Hugo Fernandes ba jornalista sira iha Kaikoli Dili, tersa 30/07/204
Hugo sublina, formasaun ne’e foku liu ba dosente sira, maibé la’os ba estudantes sira ho razaun sira (dosente) iha ona esperiénsia hanorin nian, tanba envolvimentu ho CNC nian iha tempo naruk, dosente sira ne’e la’os foin hanorin, maibé iha ona esperensia oinsá bele hanorin ho di’ak ba estudante.
Iha Sorin seluk formadora Marisa Gonçalves, haktuir modulu CNC planu konvida formadora sira iha Timor atu bele dezenvolve kurikulu ida ne’e ba iha universidade Sira iha Timor láran tomak.
“Ohin Ita hahu ho formasaun ba formadora professora universitário sira iha Timor, hanorin ho módulo CHEGA nian ho konstrusaun dame nian, justisa transisional e direitos humanos, CNC nia planu konvida mos formadora sira iha Timor hodi dezenvolve kurikulum ida ne’e ba universidade sira ne’ebé hakarak integra ba modulo ne’e iha kuríkulu ba aban bairua nian, Ita mos presija haree ba rekursu iha Timor-Leste tanba Ita iha testo leitura ho lian Tetun, português no inglês,” haktuir nia.
Observasaun Lafaek News iha formasaun dahuluk ne’e, materia importansia iha eventu ne’e mak hanesan, istória, direitus humanus, edukasaun paz no justisa tranzitoria no dosente sira iha antusiazmu hodi aproveita formasaun ne’e ho di’ak.
Estajiadu: Ezequiel Freitas
Editor : Agapito de Deus
