Lafaek News–Felismino Soriano da Costa ofisialmente lansa livru Karta Ba Nai ho objetivu fundamentu atu motiva juventude feto no mane sira atu iha espíritu lee no hakerek sai hanesan kultura iha atividade loro-loron.
Kontéudu hosi livra refere lori mensajen kona-ba edukasaun, saúde, ekonomia no motivasaun ba moris, hodi inspira leitor sira atu kontinua aprende no dezenvolve-an.
“Livru ida ne’e bazeia ba pontu prinsipál tolu, mak edukasaun, saúde no ekonomia. Bainhira ema komprende área hirak ne’e, nia bele prepara an di’ak liu ba futuru,” Felismino Soriano da Costa ba jornalista sira iha loron Kuarta 01/07/2026 iha salaun TVE Raikotu Eskola Saun Miguel Arcanjo.
Hodi esplika katak Karta Ba Nai la’ós de’it livru ida atu lee, maibé sai hanesan meiu ida atu transmite valór no esperiénsia moris ba jerasaun founm tema hirak ne’e la’ós de’it ba estudante sira, maibé relevante ba ema hotu-hotu ne’ebé hakarak hadi’a qualidade moris ho objetivu atu fó inspira no haforsa leitór sira atu la hakfodak hasoru dezafiu iha vida.
“Livru ida ne’e ko’alia kona-ba motivasaun ba moris. Ha’u hakarak atu leitor sira fiar ba sira nia kapasidade no kontinua luta atu alkansa sira nia mehi,” dehan nia.
Iha oportunidade ne’e, Felismino mos bolu liu-liu juventude Timor-Leste atu hametin kultura leitura no hakerek, tanba rua ne’e mak dalan importante atu hasa’e koñesimentu no kontribui ba dezenvolvimentu nasaun.
“Lee barak, no hakerek barak. Leitura loke ita nia hanoin no hakerek halo ema seluk bele koñese ita nia ideia no kapasidade hakerek la’ós deit atividade ba autor sira, maibé bele sai hanesan meiu ida atu dokumenta esperiénsia, kultura no istória ba jerasaun tuir mai”
Serimónia lansamentu livru Karta ba Nai ne’e mos hetan partisipasaun husi Ministru Arte no Kultura, ne’ebé hatudu apoiu ba dezenvolvimentu literatura nasional no incentiva autor Timor-oan sira atu kontinua produz obra literária ne’ebé bele kontribui ba edukasaun no kultura iha Timor-Leste.
Lansamentu livru ne’e remata ho esperansa katak karta ba nai bele sai hanesan fonte inspirasaun ba juventude no komunidade tomak atu valoriza leitura, hakerek no aprendizajen durante moris tomak.
Jornalista Estajiado : Marcos X de Britio
