Lafaek News— Magnifíku Reitór Universidade Nasionál Timor Lorosa’e (UNTL), Juviano António da Costa, hamutuk ho estrutura no komisaun organizadora, anunsia mudansa ba kalendáriu graduasaun dala tolunulu-resin-haat (XXXIV) ba loron daruak nian. Mudansa ne’e akontese tanba deklarasaun lutu nasionál ba saudozu Eis-Prezidente Repúblika Demokrátika Timor-Leste, Francisco Guterres Lu Olo.
Magnifíku Reitór UNTL, Juviano António da Costa, hateten planu Universidade Nasionál Timor-Lorosae atu realiza graduasaun iha loron 25 no 26 juñu 2026 iha Sentru Konvensaun Dili. Maibé, ho pasamentu saudozu Lu Olo iha domingu, 21 juñu 2026 kalan, Governu liuhusi Dekretu-Lei no. 4/2026 deklara lutu nasionál. Tanba ne’e, serimónia loron daruak ne’ebé antes marka ba sesta, 26 juñu muda fali ba segunda, 29 juñu 2026.
“UNTL nia programa graduasaun ba dala-34 maka iha loron 25 no 26 juñu 2026. Maibé ita nia erói bo’ot ida, Francisco Guterres Lu Olo, husik ona nasaun no nia povu, fila ba Aman Maromak nia kadunan santu iha loron 21 juñu 2026. Bazeia ba ne’e, Governu hasai Dekretu-Lei no. 4/2026 kona-ba lutu nasionál atu ita hotu fó omenajen ba maktoban,” dehan Magnifíku Reitór Juviano António da Costa, liu husi konferénsia imprensa iha Sentru Konvensaun Dili, Kinta (18/06/2026).
Nia esplika, loron 25 juñu 2026 graduasaun sei la’o tuir programa ne’ebé iha ona. Maibé loron daruak, iha situasaun fúnebre ba saudozu Lu Olo, UNTL deside muda ba Segunda-feira, 29 juñu 2026
Magnifíku Reitór husu deskulpa ba inan-aman no graduadu sira ne’ebé prepara ona sira-nia tempu hodi partisipa iha Sesta-feira.
“Deskulpa ba inan-aman sira no alin graduadu sira ba mudansa programa ne’e. Mudansa ne’e la’ós buat baibain, maibé situasaun iha nível nasionál. Tanba ne’e husu ba inan-aman no graduadu sira atu komprende ita nia situasaun,” nia hateten.
Professór ne’e mós husu ba inan-aman no graduadu sira atu partisipa iha serimónia fúnebre saudozu Dr. Lu Olo no kuidadu an atu labele hetan impedimentu ruma hodi bele gradua iha Segunda-feira.
Graduasaun 29 Juñu 2026 sei fahe ba sesaun rua, iha sesaun dadeer, Fakuldade Siénsias Sosiál no Polítika, Ekonomia no Jestaun, Direitu, Fakuldade Turizmu, Artes no Indústrias Kriativas no Kulturais, Filosofia no Siénsias Humanas. Iha sesaun lokraik, Fakuldade Edukasaun no Humanidades.
Jornalista: Gracia Soares
