Lafaek News—Sekretaria Estadu Komunikasaun Sosial (SEKOMS) ho Ministériu Administrasaun Estatal (MAE) hamutuk Igreja, tersa, 16/07/2024, iha ne’ebé ofisialmente lansa portal hodi fasilita prosesu akreditasaun ba jornalista nasional no internasional hodi asesu ba kobertura vizita sua Santidade Papa Francisco iha Timor-Leste.

Sekretaria Estadu Komunikasaun Sosial, Expedito Dias Ximenes informa, lansamentu karta akreditasaun ne’e oinsá mak ekipa média vizita sua Santidade Amu Papa Francisco, iha prosesu akreditasaun ba média nasional ho internasional, hanesan ema hotu hatene vizita Amu Papa nian mai iha Timor-Leste iha signifikadu espíritual no kultural ne’ebé bo’ot tebes ba sarani no povu Timor-Leste.

“Eventu ida ne’e, la’os de’it atu hametin ita nia fiar, maibé mós atu halibur ita hanesan nasaun hodi selebra paz, solidariedade, fraternidade ba povu Timor-Leste liuhusi prenzensa Amu Santu Padre, nu’udar sinal bensaun no esperansa iha momentu ida ne’ebé ita hein ho esperansa ne’ebé bo’ot tebes, ita sei haree ba prosesu akreditasaun, liu-liu kona-ba kriteira ne’ebé verifika ba média vizita Amu Papa nian, tan ne’e, liuhusi lansamentu ba prosesu akreditasaun ida ne’e, ita sei halo verifikasaun detallu ba dadus no dokumentus sira ne’ebé jornalista sira sei submete mai, alende halo verifikasaun inklui mós autensidade ba informasaun klara no loos hodi válida fila fali dokumentus ne’ebé jornalista sira hato’o. “Tanba limitasaun espasu ba jornalista sira atu halo kobertura, ho ida ne’e mak programa vizita Amu Papa nian ne’e, asegura di’ak liután kobertura jornalista ne’ebé organizadu no aseguradu, professional hodi avalia mós kuantidade ba kolega jornalista atu halo kobertura, jornalista sira sei simu akreditasaun no simu distribuisaun ba eventu husi programa sira ne’ebé vizita Amu Papa nian,

Sorin seluk Ministru Administrasaun Estatal,Thomas do Rosario Cabral, relata katak, ohin ita marka eventu ida ba kredensial ne’e faze importante ida, tanba servisu ne’ebé média atu halo kobertura ba eventu ida ne’ebé importante, tanba ne’e média nia servisu mós importante tebes iha eventu ida ne’e, nune’e mós ita sei simu média internasional sira mai husi rai liur inklui kobertura husi média nasional sira nian ne’ebé ita nia populasaun hein hela informasaun husi jornalista sira.

“Tan ne’e, nia husu ba média sira, liu-liu média lokal sira tenke servisu ho professional hodi halo kobertura ne’e masimu tebtebes, tanba kondisaun ita nian mak ida ne’e, maibé iha Tasi tolu ba oras ne’e atinji ona 80% besik hotu ona, iha deit servisu ba finalizasaun no média senter depois ita sei monta no sentru ba sekretariadu vizita Amu Papa mak ida ne’e, atu nune’e ita kontribui ba susesu ida ne’ebé ita hotu hein nomós susesu ba jornalista sira hotu hodi loriinformasaun ba ita nia popula”aun”. Tomas do Rosario Cabral, agradese.

Entretantu Arsebispu Metropolitana Dili, Dom Virgílio Cardeal do Carmo da Silva, hatete ohin liuhusi eventu ida ne’e hodi lansa akreditasaun ba média nasional nian, ita bele dehan katak tau ona fatuk inan ida ne’ebé importante tebes iha ita nia preparasaun ba iha vizita Amu Papa nian, ida ne’e atu fó hanoin mai ita katak, ita hakarak hatudu duni ba mundu liuhusi buat ne’ebé di’ak no kualidade liuhusi ita nia identidade nu’udar nasaun ida.

“Liuhusi akreditasaun ida ne’e, hakarak atu tais duni ida ne’ebé soin no bele mak fó sai mensajen ka imajen bo’ot liuhusi ita nia média sira, tanba ne’e ami nia parabens ba responsavel sira liu-liu sekretariu estadu komunikasaun sosial, ne’ebé ohin konvida ita hotu mai iha ne’e hodi lansa akreditasaun hodi ajuda ita hotu bele prepara ita-an di’ak liután hodi simu ita nia Santu Padre, tanba ne’e bom susesu no bom traballu ba média sira hotu hodi lori Timor ba iha mundu liuhusi informasaun ne’ebé jornalista sira fó sai kona-ba vizita Amu Papa nian, ho tema vizita Amu Papa nian katak, Que A Vossa Fé, Seijá A Vossa Cultura”. Dom Virgílio Cardeal do Carmo da Silva, hakotu.

Jornalista : Crispin de J. Amaral

Editor       : Agapito de Deus