Lafaek News—Estadu Timor Leste deve ona osan total Millaun Atus Neen ($ 600.000.000.00) inklui ho doasaun no asistensia tekniku husi Asian Development Bank (ADB) hodi hala’o dezenvolvimentu iha rai-laran seidauk selu.
Asuntu ne’e hatoo hosi Country Director Asian Development Bank (ADB), Stefania Dina, ba lafaek News kuarta (10/01/2024), hafoin ho ekipa halo vizita iha atividade Konservasaun Bee hosi PERMATIL iha Fatsuk Suku Dare munisípiu Dili.
“Agora dadaun tuir portofoliu ADB Osan $ 600.000.000.00, portofoliu ida ne’e inklui doasaun inklui asisténsia téknika, no kona-ba projetu ADB liuliu iha setor transportes nian hanesan estrada nasional kobre territoriu nasional Timor Leste,” informa Country Director ADB ne’e.
Projetu ADB iha setor transportes ninian mak hanesan hahú husi estrada fronteira, Likisá, Dili, Manatuto liga Laklubar ho Natarbora, Baukau ho Lautém, inklui osan imprestimu ba aeropotu, ho porjetu bee mos kobre munisípiu Lautém, Vikeke inklui Munifahi ho Dili.
Aliende ne’e, iha mos programa enerjétiku kobre sidade Vikeke, Lautém, Manufahi ho Dili, inklui modernizasaun atu suporta EDTL ba distribuisaun enerjia ba territóriu nasional, iha mos projetu kiik ida kona-ba reavilitasaun kafé nian inklui suporta implementasaun nasional Coffee Sector Development Plan.
“ADB mos fo asisténsia téknika ou programa kapasitasaun kafé iha area oi-oin, inklui area ba Asean nian, no mos programa suporta justisa nian no area seluk-seluk tan, tan ne’e osan $ 600.000.000.00” balun ba imprestimu no ba programa doasaun no asisténsia téknika” Stefania afirma.
Ekipa kobertura : Lafaek News
Editor : Agapito de Deus
