Lafaek News–Prezidente Repúblika José Ramos-Horta parabeniza Diretór Ezekutivu Perma Kultura Timor-Leste, Ego Lemos ho nia membru sira, tanba bele konserva ona be’e-matan atus tolu resin iha Timor-Leste.
“Fó parabens ba Ego Lemos ho nia organizasaun PERMATIL tinan hira nia laran halo serbisu ne’ebé diak, kualidade, para rekopera be’e matan iha Timor-Leste, rekopera ona be’e matan atus tolu resin,” hateten Xefe Estadu José Ramos-Horta, iha semináriu no primeiru kongresu nasionál Asosiasaun Permayouth Timor-Lorosa’e, iha Salaun Laline Larigutu CNE Díli, (29/11/2023).
José Ramos-Horta afirma, sei buka doadór internasionál sira hodi fó apoiu ba organizasaun PERMATIL atu halao nia atividade konserva be’e-matan sira.
“Hau garante mobiliza finansiamentu internasionál, lalika preokupadu ho Governu, tanba Governu iha prioridade mós barak,” promete Xefe Estadu Ramos-Horta.
Xefe Estadu mós sujere ba joven sira atu
ajuda organizasaun PERMATIL hodi hamos lixu, kuda ai-oan no halo konservasaun ba be’e-matan sira iha Timor-Leste, nune’e bele kontribui ba ambiente ne’ebé saudavel.
“Oinsá mobiliza joven sira pertense ba grupu artemarsial sira ne’ebé e estuda durante periodu ferias kuandu eskola remata em vez tur bilan la halo buat ida mobiliza sira hamosu lixu, iha Timor-Leste tomak, kuda ai, ajuda PERMATIL hadia be’e-matan sira e fó pagamentu ba sira,” sujere Horta.
Foin lalais ne’e, Ego Lemos sai hanesan manán na’in ba prémiu Ramon Magsaysay 2023 ho tema “Transforming Asia, Inspiring The World” ho kategoria Food Sovereingnity Visionary.
Prémiu ne’e atribui ba ema na’in hat nu’udar inspirador mak hanesan, Korvi Rakshand husi Bangladesh, Miriam Coronel Ferrer husi Filipina, Ravi Kannan husi Índia no Ego Lemos husi TL.
Estajiada : Epifania I.Pinto
Editor : Agapito de Deus
