Lafaek News–Prezidente Repúblika, José Ramos-Horta hateten, nia parte sei veta alterasaun dahuluk Lei Estatutu Deputadu ne’ebé kria subsídiu ba saúde no subsídiu transporte ba deputadu 65 iha Parlamentu Nasionál.
“Ha’u iha kapasidade para veta, e ha’u sei ko’alia ho maun boot Xanana,” hateten Xefe Estadu José Ramos-Horta, hafoin partisipa semináriu no kongresu PERMAYOUTH Timor-Leste nian, iha Díli, (29/11/2023).
José Ramos-Horta haktuir katak, durante ne’e Estadu kria sempre tau orsamentu ba saúde, tan ne’e kualker sidadaun, deputadu, membru Governu, tenke ba halo tratamentu saúde iha rai liur.
“Estadu iha ona orsamentu jerál ba saúde,ema ida ke moras, kualker sidadaun, deputadu, membru Governu, sidadaun baibain tenke ba li’ur,” informa Xefe Estadu konsidera, aprovasaun lei hodi fó subsídiu saúde dólar 600 no subsídiu transporte dólar 1.600 ba deputadu sira ne’e, hanesan injustisa boot ba povu, no sira mak hakarak hafoer sira nia naran, ne’e halo deputadu sira nia naran bele foer aat los, depois injustisa boot, ne’e duni ha’e sei ko’alia ho Primeiru Ministru, Prezidentu PPN para haree labele hamosu klase ida,” katak Ramos-Horta.
Tuir nia, Governu tenke aumenta osan ba inan sira, kosok oan sira, ferik katuas, joven, estudante sira, nune’e labele hamosu klase iha Timor-Leste.
Antes ne’e, iha diskursu Xefe Estadu nian iha ámbitu Komemorasaun loron proklamasaun independensia ba dala-48, Ramos-Horta bolu atensaun liu ba Governu atu tau prioridade iha setór Edukasaun, Saúde, Agrikultura no hadia infrastrutura sira iha rai laran.
Alterasaun dahuluk Lei Estatutu Deputadu, aprova ona husi Parlamentu Nasionál ho votus a-favor 50, Kontra 1 no Abstensaun Lima 6.
Estajiada : Epifania I. Pinto
Editor : Agapito de Deus
