Lafaek News—Banku Nasional Ultramarinu (BNU), felizmente selu hikas kliente minoridade nia osan iha konta poupansa ne’ebé deskonfia BNU komete Roubaleiro foti subar kliente minoridade husi konta poupansa montante $ 424, 76.
“Ha’u fila fali liu husi meius ida ne’e hakarak dehan, publikamente, kona-bá ha’u nia publikasaun kontra BNU iha ha’u nia pájina Facebook semana ida liu ba, Ha’u hatama ha’u nia karta reklamasaun iha loron 9/01/2023 ba iha Banku Sentral Timor-Leste nian, Portantu, ohin ha’u hetan ona karta resposta husi BNU kona-bá hau nia karta refere, rezumu husi resposta husi BNU maka hanesan tuir mai ne’e, BNU rekuñese konta bankária ha’u nia oan minoridade nain rua nia nudar “ konta ba Poupansa ou konta Jovém” entaun sira sei izenta ou sei la selu ka livre husi taxa komisaun ba manutensaun to’o sira atinje tinan 17 (sanulu-resin-jitu),” katak katak minoridade aman rasik ho naran inisial JGL ba lafaek news foin lalais.https://www.lafaeknews.tl/deskonfia-bnu-komete-roubaleiru-ba-kliente-minoridade-nia-osan-konta-populansa/
Hó nune’e, Taxa Komisaun ba manutensaun ne’ebé BNU ko’a ou debita desde 2013 to’o prezente data, nudar kobransa ne’ebé ho forma “Indevida” ou lolos ne’e BNU la devia ko’a ka kobra iha labaraik sira nia konta bankária Jovém;
Labarik sira nia osan ne’ebé sira (BNU) debita ka ko’a ona durante ne’e , BNU sei devolve hotu ou restitui fila-fali, imediatamente, ba iha Konta oan sira nian, maibé karta ne’e la hatete osan inan ne rende jurus ou iha funan ka lae durante períodu sira ne’e;
BNU mós lamenta no la kontente ho situasaun ne’ebé maka akontese ona, tambá de’it kestaun “meramente lapsu ou falla husi sistema operasional” ne’ebé maka sira detekta ona iha sistema kobransa ba despezas ne’ebé asosia ba konta bankária ne’ebé dadaun ne’e kestiona hela, tambá konta bankárias sira ne’e loke desde 2008 no 2009, da-huluk liu “konta hau nia futuru “iha 2015);
BNU mós halo alegasaun kontra ba iha ha’u nia publikasaun iha Facebook dehan katak : ha’u halo ofensas gratuitas, la proporsionadu no suporta deit husi faktus falsus sira, akresenta tan katak: hau ha-foer sira nia naran ka ha- mo’e no hatun sira nia reputasaun.
Konabá alegasaun iha pontu 5 iha leten, hau atu refuta ka atu dehan kontra ba afirmasaun sira ne’e, alegasaun ne’e lahanesan faktus neebe hau deskreve iha hau nia karta ba Banku sentrál) maibé husik ona bá importante maka hau nia oan sira nia osan BNU afirma ona atu devolve fila fali ba sira nia konta, Portantu, ida ne’e ita bo’ot sira (klientes sira hotu) maka bele foti konkluzaun rasik deit bá, hau lakoi fó ona hau nia komentáriu no hela ho hanesan ne’e deit ona.
Ikus liu hakarak fo mensajém ba públiku tomak “ katak lalikan tauk halo reklamasaun kuandu iha razaun no iha direitu sente ema seluk ka instituisaun ruma viola, buka entidade Estadu nia ne’ebé maka iha kompeténsia atu rezolve ita nia problema. Importante ida mós maka ita temke hatudu faktus no provas konkretu hodi suporta ita nia Denúnsia, se ita laiha faktus no provas ne’e araska uituan, atu ita labele halo alegasaun falsus no baratus ba ema ka instituisaun nia personalidade,
Ba Klientes sira Banku Komersiál iha Timor-Leste nia mós, karik iha problema hanesan ha’u hasoru (lakon ita nia direitu) bele halo reklamasaun, desde ke ita iha komprovativus suficiente.
“Obrigadu ba ita bo’ot sira ne’ebé fó ona suporta no fo korajém mai hau, liu husi komentárius sira. La haluhan mós, fó ha’u nia agradesementu ba Banku Sentral ne’ebé solusiona ona problema ida ne’e iha tempu badak nia laran, Ikus lia hau nia mensajém ba BNU no banku komersial sira seluk, temke ho fuan bo’ot simu ami kliente nia krítika konstrutiva, tambá ho ami nia krítika maka imi bele hadia imi nia sistema kobransa operacional ne’ebe maka imi durante ne ‘e nunka detekta ninia erru e mós bele mellora liu tan imi nia prestasaun servisu bankária ba ami klientes sira. Imi moris no Bo’ot ho no ami, keta halakon no halo abuzu ami kliente nia konfiansa ne’ebé ami depozita ona bá imi,” JGL hakotu.
Jornalista : Acacio Pinto
Editór : Agapito de Deus
