Lafaek News—Vicente Vaz, idade 48 no oan na’in 4 husi Rejiaun Administrativa Espesial Oe-Cusse Ambeno (RAEOA, faan tutan ema husi Indonézia ninia bakso hafoin fulan ida selu ho salariu 150 USD, loron manas dudu karosa husi Tasi-Tolu, too Tibar hodi buka netik osan atu bele sustenta nesesidade uma laran.
Vicente komesa faan Na’an Kabuar (bakso) dezde tinan 2007 too ohin, sustenta nesesidade moris hi na’an kabuar, razaun nia deside fan iha Tibar, tanba Dili laran restaurant barak, ema prefere ba an iha restaurant kompara na’an kabuar sira ne’ebé dudu ho karosa iha Estrada ninin, nune’e Vicente kria hanoin seluk hili Tibar hanesan fatin tarjetu hodi faan na’an kabuar.
“Ha’u faan Bakso desde 2007 too ohin loron, nune’e kada loro-loron ha’u sempre dudu Bakso gerobak husi Tasi-tolu too tibar ho razaun ha’u faan bakso iha Tibar ne’e tanba iha Dili laran Warung barak entaun bainhira ha’u faan iha Dili laran la folin, entaun ho ida ne’e mak ha’u iha ideia ida ba faan iha tibar husi meudia too kalan no ema hirak ne’ebé sosa bakso mak maluk sira ne’ebé babain hili kalen iha lixu Tibar no dalaruma mós ema sira viajen,”dehan Vicente Vaz ba Lafaek News iha Tibar foin lalais.
Sakrifika an dudu karosa husi Tasi-Tolu ba Tibar la’os husi loron manas nia laran, kosar metan sulin, la’os atu sai atan ba ema seluk, maibé pasiénsia tenke servisu hanesan atan ho ema seluk atu bele hetan osan sustenta moris loro-loron, tanba Timor Ukun An la signifika buat hotu mosu de’it, nasaun mak ukun an, maibé ekonomia iha ema seluk nia liman.
“Ha’u nia objetivu mak ha’u tenki lori oan sira ba Dili no fila-liman hodi haruka oan sira eskola no sustenta familia uma laran tán ne’e mak ha’u esforsu ha’u nia aan hodi buka moris liuhusi faan bakso tuir dalan, nune’e ha’u babain sai husi uma jam 9 dader no fila uma jam 9 kalan depende ba bakso hotu”.dehan Vicente Vaz
Maibé, nia dehan, hakarak hadia moris labele lakon vontade, pronto hasoru dezafius maské loron manas no udan ho distánsia dook, maibé ida ne’e la sai barreira atu luta ba moris.
“Dezafiu ne’ebé ha’u hasoru loro-loron bainhira ha’u faan bakso mak hanesan gerobak todan, distansia dook dalaruma udan anin nomós loro-manas maibé ha’u senti ida ne’e lasai barreira ida hodi ha’u esforsu aan hodi kontinua ba faan nune’e ha’u bele sustenta ha’u nia familia”. Haktuir Vicente Vaz
Jornalista : Zita Menezes
Editór : Agapito de Deus
