Lafaek News–Prezidente Komisaun Organizador Partidu Frente Mudanca (FM) Cesar Moreira, rekomenda ba partidus polítikus sira atu nomeia ema ida ne’ebé iha kapasidade di’ak hatene lian Ingles, Portuges, Tetum, Indonézia ho Latina hafoin bele admite ba kandidatu prezidente repúblika, partidu labele nomeia ema ida inkapasidade atu hamonu imajen Timor nian iha komunidade internasional nia matan. 

Prezidente KO Frente Mudanca, Cesar Moreira hateten, bazeia ba debate ne’ebé akontese iha GMN tv, no sira halo kampaña iha fatin-fatin afinal kandidatu balun laiha kapasidade atu ukun rai ne’e, tanba pozisaun prezidente repúblika hanesan kan’ar ne’ebé importante ba nasaun Timor Leste. 

Ita hakarak Kapasidade kandidatu sira ema ne’ebé matenek, ita lakohi ema ne’ebé ko’alia sabraut no la kompriende buat ida, hakerek ona más lee de’it la loos, mundu observa hela Timor, ema bele hatene afinal Timor nia kapasidade mak ida ne’e, ha’u hanoin Timor ne’e iha matenek barak, más balun sente katak la matenek lalika obriga an,’’ dehan prezidente KO partidu Frente Mudanca ba lafaek news iha Pantai Kelapa, kinta (17/03/22).

Cesar Moreira, sujere ba Prezidente Repúblika foun tenke halo lei ne’ebé réjidu no lei ba partidus, tanba iha Timor Leste fasil liu ema harii partidu too Arte Marsiál sira bele harii partidu, se hanesan ne’e be-beik bele fo problema ba futuru nasaun ida ne’e.

 Iha kampaña ita rona di’ak liu hili ema beik atu ukun rai ida ne’e, tanba ema beik mak ita haree malu,  intervensaun hirak ne’e ha’u hanesan ita la respeita prosesu ne’ebé réjidu iha ita nia rain, ema barak fakar ran ba nasaun ne’e ohin ukun rasik an, sira ne’ebé uluk harii movimentu ba ukun ne’e la’ós ema beik, meszmu idade kiik, maibé ema mesak matenek, afinal mai fali ita ida agora atu hatutan ne’e mak kakutak la kompriende buat ida,’’ Cesar akresenta.

Cesar Moreira hateten, nasaun ne’e ema barak mak mate hodi sosa ukun rasik an, presiza ema matenek hodi ukun rai ne’e, tanba ukun nasaun la’ós ukun partidu ukun arte marsial, labele halimar ho nasaun ho povu nia vida, nasaun tenke la’o ba oin no ema tenke iha kapasidade di’ak koñesimentu asuntu interna ho externa.

 Nia afirma, mundu atu koñese nasaun ida iha fator tolu, primeiru lider, sorte Timor Leste iha netik lider nain rua ne’eb mundu koñese atu mundu hateke Timor ne’e iha ne’ebá, segundu nasaun iha nia rekursu rasik, maske Timor la riku maibé iha rekursu naturais hodi dada investor sira husi liur mai investe, ikus liu mak rai ne’e nia istória réjidu, ukun an ne’e la’os ema tau bandeza mak fo ba Timor, liu husi prosesu naruk ne’ebé marka istória oi-oin.

Tan ne’e buat tolu ne’e mak mundu koñese ita Timor, agora ita ida atu ba ukun ne’e tenke prepara an atu sai lider ne’ebé atu mundu labele haketek ita ne’e kiik oan, bainhira sente laiha kapasidade lalika obriga an, tanba ne’e tenke iha ona lei se mak atu sai boot tenke iha kapasidade,’’ Cesar sublina.

ikus liu, prezidente KO Frente Mudansa ne’e hatoo sujestaun antes molok prezidente foun mai atu haree situasaun hirak ne’e, husu xefe estadu foun atu servisu ho parlamentu ho governu nune’e bele hadia lei ba partidu polítika sira bainhira atu kandidata an ba prezidente repúblika tenke iha kapasidade másimu.

Ha’u asiste debate iha televizaun ne’e hau sente triste, no ema barak haree hakruuk de’it, iha ema balun husu pergunta más resposta fali oin seluk, ha’u husu prezidente foun labele husik situasaun hanesan ne’e,’’ Cesar fundamenta.

Ikus liu Cesar husu Timor oan hotu tempu too ona atu fo votus ho lolos nune’e tau ema lolos iha fatin lolos, rai ne’e atu la’o ba oin presiza ema matenek no iha koñesimentu di’ak iha diplomasia ho nasaun hotu hodi lori Timor ba mundu no lori mos mundu mai Timor.

Jornalista : Azelio da Cruz

Editor        : Agapito de Deus