Lautem-(Lafaek News)—Sekretáriu Estadu Peskas enkoraza grupu peskas Lore I postu administrativu Lospalos, munisipiu Lautem, atu aprende barak iha area peskas nian hodi servisu iha tasi, iha ne’ebé ba futuru sei instala portu peskas.
SEKooP Elidio de Araújo, hatoo asuntu hafoin vizita grupu peskas iha kinta (11/06/2021,) objetivu haree direta fatin insatalsaun Portu peskas ne’ebé tama ona iha planu prioridade oitavu governu konstitusionál, Lore sai futuru instalasaun peskas tanba governu atu sosa mós ró peskas ba peskadór sira.
“Ita iha ona planu sosa ró komersiál peskas depois ró sira ne’e sei halo movimentu iha tasi mane hodi kaer ikan husi Lore tama ba to’o Suai ne’ebá, Lore ne’e aban bainrua posiblidde sai Portu peskas atu ita nia ró peskas sira mai para iha ne’e,” katak nia.
Planu harii Portu ne’e sei tama ba iha planu prioridade OJE 2022, sei sosa ró peskas hamutuk 110, distribui ba grupu peskas sira ne’ebé iha area tasi ibun iha territóriu Timor.
Sorin seluk sekretáriu estadu hasoru direta grupu peskas ne’ebé tuir hela treinamentu ne’ebé fasilita husi tékniku peskas nian hodi husu atu Lore oan aprende makaas iha area peskas hodi bele muda peskas tradisionál sai peskas modernu.
Iha fatin hanesan Xefe grupu peskas João provincial, apresia ho vizita governante ne’e Lore hodi haforsa kbiit peskador sira nia badinas atu bele kapasita an oinsá modernza peskas tradisional ba modernu.
“Ami mós kontente hasoru malu ho sekretáriu estadu ami sei husu direta planu ne’ebé mak planeia atu sosa ró mai ami peskadór sira, governu iha planu no ami persija tebes treinamentu no oinsá halo manutensaun ba ro ne’ebé mak tuir planu atu fó mai ami grupu peskas sira no oinsá halo jestaun ba peskas ne’ebé mak ami halo,” hakotu nia
Jornalista : CE. Lautém
Editór : Agapito de Deus
