Lafaek News- Organizasaun Naun-Governamental (NGO) Perma kultura Timor-Leste (PERMATIL) apoiu ai-han bázika no material hortikultura hanesan fini ba familia Juvita das Dores da Silva ho nia kaben Domingos Pinto  Juvita hanesan eis ajente prinsipal PNTL ne’ebe hetan demisaun husi nia supeiror PNTL iha Tinan 2019  ne’ebé agora dadauk hasoru problema ekonómia,saude no edukasaun iha nia familia uma laran .

Diretur Ezekutivu Perma Kultura Timor-Leste (PERMATIL), Ego Lemos, hatete, informasaun ne’e asesu iha média Lafaek news fó sai kona-ba Juvita ho nia kaben nia kondisaun moris ne’ebe lakon servisu, edukasaun no saude , nune’e mai vizita direitamente nota katak situasaun ne’ebe sira infrenta defisil tebes atu rejolve, tan ne’e PERMATIL foti desizaun apoiu sira iha fornasaun hiortikultura no apoiu material atu kuda rasik modo iha sira nia kintal.

“Ami husi PERMATIL apoiu uluk ai-han uituan ba sira (Juvita ho Domingos no Oan sira), ami mós hare’e fatin ne’e espasu luan no kapas no bee ituan iha, entaun ami deside fó ekipamentu hanesan insada, kanuru boot, aisuak, polibag,lori kedas ho fini , atu nune’e sira bele hahu utiliza rekursu ne’ebe mak oferese hodi bele kuda iha sira nia kintal ,” dehan Diretur ezekutivu PERMATIL, Ego Lemos, ba lafaek news iha Beto Timur, aldeia naroman suku Madohi, kinta, (10/06/2021).

PERMATIL kompromete sei haruka ekipa halo akompanamentu no fó formasaun ba Eis Ajente PNTL (Juvita das Dores da Silva) ho nia kaben Domingos Pinto no Oan sira kona-ba halo kantreiru hodi kuda modo to’o hetan rendimentu.

“Ami husi PERMATIL promete, ekipa sei halo akopaniamentu ba mana ho maun no alin sira sei fo formasaun, oinsa halo kantadeiru produs adubus organikus no kuda modo to’o ita lori ba merkadu atu bele hetan rendimentu, tanba preokupasaun mana ho maun hasoru maka sira laiha rendimentu, tanba mana lakon servisu no maun mós la servisu entaun lakon rendimentu,”  Ego promete.

NGO PERMATIL sei bolu mós Juvita das Dores da Silva ho Domingos Pinto nia oan sira nain ha’at atu tuir formasaun kona-ba agrikultura no konservasaun bee hodi bele hetan esperenisa atu bele garantia sira nia moris iha futuru liu husi dalan kuda modo hodi fa’an no konserva natureza iha Timor Leste .

“Alin nain rua ne’ebe ho idade 18 ba leten ami sei fó formasaun ba sira bainhira ami halo atividade joventude nian, ami sei involve sira tuir formsaun oin-oin liu-liu kona-ba agrikultura, konservasaun bee no rai, maske sira la eskola boot mas iha ona esperensia ruma ne’ebe garantia ba sira nia futuru,” dehan Ego.

Fatin hanesan Xefe suku Madhoi, Bernardino de Cristo Ferreira, apresia ho PERMATIL nia presensa iha suku Madohi hodi apoiu ai-han ba nia komunidade, no hanoin atu hamosu formasaun kona-ba agrikultura nune’e nia parte prontu koopera. 

“Ha’u senti katak apoiu ida ne’e inisia ida oinsa atu aproveita konsolidas ita nia komunidade sira ba desenvolvimentu nasional, entaun ema ne’ebe desenvolve an presija liu husi maneiras, ne’e mak PERMATIL ko’alia sei hamosu formasaun, ha’u agradese no koopera liu tan para oinsá ita servisu hamutuk lori ita nia povu ba dalan ne’ebe kuiñesementu klean no dezenvolve nia an liu husi familia ,” dehan xefe  Suku Bernardino.

Ho meius ida ne’e xefe suku sei organiza nia komunidade atu partisipa iha formsaun ne’e, tanba presensa PERMATIL nian hanesan parseiru ida ho suku Madohi nune’e bele kapasita nia komunidade sira.

“ ha’u hanoin PERMATIL mai ona ne’e nu’udar parseiru ida ba ami nia suku,hau  apoiu no organiza  joven sira mai partisipa iha formasaun ida ne’e ami atu hetan kapasita sira area hortikultura ,”  informa Xefe suku .

Nune’e mos eis ajente prinsipal PNTL Juvita das Dores da Silva, hato’o agradesemntu ba NGO PERMATIL ne’ebe apoiu ona ai-han no material hanesan ai-suak, ensada, modo musan no sasan seluk tan.

“Ami sei uza sasan sira ne’e, tanba ami presija duni hodi halo kantreiru nune’e kuda fini ne’ebe apoiu husi NGO PERMATIL ne’ebe entrega ona ba ami, ami husu agradese tebes ba mana no maun sira nia tulun para ami bele responde ba situasaun defisil ne’ebe ami hasoru,” Juvita Hato’o nia agradese ba PERMATIL .

Entertantu, ai-han no material ne’ebe PERMATIL oferese maka hanesan, foos, mie-goren, masin mer, masin-midar, mina, fini ai-manas, tomate, brinjela, aidila, kanko, modo mutin metan, kanko, no mós polibag, aisuak, katana, kanuru, karau dikur, insada, regador, balde/ton kuat, atu familia Juvita ho Domingos uza hodi  kuda modo iha sira nia kintal rasik hodi  hamenus dependeti aihan ba familia seluk. 

Jornalista : Pedro de Almeida

Editor : Acacio Pinto