Lafaek News—Polísia Nasionál Timor-Leste (PNTL), iha ona planu ba tinan 2022 halo rekrutamentu ba membru polisia foun hodi reforsa liután servisu seguransa iha Timor-Leste.
Koordenadora Relasaun Internasionál (KRI) PNTL, Superintendente Xefe Natercia Martins informa, instituisaun PNTL halo enkontru ho Komandante Timor-Leste Police Development Program (TLPDP), ko’alia kona-ba atu hadia sistema iha PNTL inklui ko’alia mos rekrutamentu membru foun iha 2022.
“Ohin ami ko’alia mos konaba rekrutamentu polísia ne’ebé tuir planu sei hala’o iha tinan oin maibé ida ne’ebé bele realiza ka la realiza tanba ida ne’e planu,” dehan KRI PNTL Natersia ba Lafaek News iha edifisiu TLPDP Hudi-Laran Dili, Sesta (02/07/2021).
Koordenadora ne’e haktuir, Governu Australia liu husi TLPDP sei PNTL, konaba estratezia sira ne’ebé mai husi Ministeriu Interior no sei halo formasaun ba membru polísia sira.
“Ohin ami koalia asuntu lubun ida ne’ebé ha’u la bele sita ida ba ida maibé ko’alia mós asuntu estratéziku kona-ba dezenvolvementu PNTL iha areas hotu no mós parseiru TLPDP sei apoiu formasaun, konstrusaun hadia sistema no apoiu asesor ka peritu ruma ba area espesífiku ne’ebé identifika ona,” Superintendente Xefe Natercia esplika.
Nia afirma, kona-ba rekrutamentu membru foun ne’e seidauk fixu tanba foin mak planu, maibé bainhira planu ne’e fiksu parte Komandu Jerál PNTL sei fo sai informasaun ba públiku atu Timor-oan sira bele kompete iha vaga ne’e.
Jornalista : Orlando Magno
Editór : Agapito de Deus
