Lafaek News—Sekretáriu Estadu ba Komunikasaun Sosiál, Merício Juvinal dos Reis “AKARA”, kinta (01/07/2021), realiza diálogu komunitária iha suku Fuat, postu administrativu Iliomar munisipiu Lautem, planea harii Sentru Informasaun iha tempu badak.
Merício Juvinal dos Reis “AKARA” afirma, diálogu refere konsege fasilita komunikasaun dada besik governante ho sidadaun sira hodi iha komunikasaun ne’ebé besik, ne’eduni iha Programa Naroman ba Suku, Edukasaun Sívika tenke iha nune’e hanorin ema oinsá uza plataforma dijitál ho matenek hodi fahe informasaun pozitivu.
“Programa ne’e mós atu lori governu ba iha komunidade nia leet hodi hatan ba ejijénsia no preokupasaun sira husi komunidade” dehan SEKOMS Merico Juvinál ba Media iha suku Fuat Postu Iliomar, munisipiu Lautem, (01/07/21).
Iha fatin hanesan Xefe Suku Fuat, Martins Pinto, apresia ho programa ne’ebé SEKOMS halo no lori komunidade hakbesik ba governu hodi hato’o preokupasoens ba ministériu relevante.
“Lori komunidade suku Fuat nia naran prontu simu programa naroman ba suku, no mós garante katak sei iha sustentabilidade ne’ebé di’ak bainhira SEKOMS harii duni Sentru Informasaun Suku ne’e” informa xefi suku Fuat.
Entretantu, antes hala’o diálogu komunitáriu ne’e, membru Governu sira hala’o vizita ba Restos Mortais, iha Erois Libertasaun Nasionál, iha Iliomar. Neduni iha diálogu komunitáriu ne’e mós, partisipa husi Vise-Ministru Agrikultura no Peskas, Abílio Xavier de Araújo, Vise-Ministru Justisa, José Caetano, Prezidente Konsellu Imprensa, Virílio Guterres, Prezidente Tatioli,IP, Manuel Pinto, Administardor Postu Iliomar, Administrador Munisípiu Lautem, PNTL, Lider Komunitáriu, Padre no Madre husi Parokia Iliomar inklui komunidade sira.
Jornalista : Juvita dos Santos
Editór : Agapito de Deus
