Lafaek News—Diretora Ezekutivu Fundu Dezenvolvimentu Kapitál Umanu (FDCH), Leila Cárceres do Santos, informa, bolseiru Timor-oan hamutuk rihun 1039 sei kontinua estudu iha rai liur.
Diretora ezekutivu FDCH, hatete, Bolseiru sira ne’ebé mak sei iha estranjeiru FDCH asegura nafatin sira nia kustu de vida, balun mós liga ho situasaun pandemia Covid-19 entaun maioria halao estudu online, no FDCH mantein nafatin pagamentu kustu de vida ba bolseiru sira.
“Ita atu dehan nasaun ne’ebé mak barak liu ne’e investimentu iha rai laran, barak liu iha ita nia rai laran liuliu UNTL, tuir fali mak Portugál no Brazil, no Ita nia bolseiru daudauk ne’e ativu purvolta de 1039, diretora FDCH, Leila Cárceres, informa ba jornalista sira iha salaun auditóriu liseu, UNTL sesta, (02/07/2021).
Normalmente bolseiru ne’ebé mak fundu dezenvolvimentu kapitál umanu investe ba ne’e barak liu mai husi funsionáriu públiku, maibé ba públiku nian mak agora FDCH kria hela programa ida naran estájiu profisionál.
“Ami agora kria hela programa ida ita bolu estájiu profisionál, ida ne’e atu ajuda bolseiru sira ne’ebé mak foin remata sira nia estudu”, nia dehan.
Bainhira bolseiru ne’ebé mak remata estudu iha rai liur fila mak seidauk hetan servisu entaun FDCH bele ajuda sira integra ba iha merkadu de traballu tuir duni area sira ne’ebé mak estudu ona.
“Ami halo kooperasaun ho ministériu selu-seluk inklui instituisaun ne’ebé relevante ho sira nia estudu, ami seidauk update dadus 2021 nian, maibé ita iha ona graduadu hamutuk 4 mil ital ne’e númeru boot liu mak mai husi funsionáriu públiku,” nia afirma.
Nia fundamenta, dekretu lei fundu dezenvolvimentu kapitál umanu númeru 13/2020 ne’ebé kompeténsia tomak ba bolsu estudu funsionáriu públiku kabe liu ba komisaun funsaun públiku no INAP.
Prosesu ne’e hanesan fundu dezenvolvimentu kapitál umanu preve orsamentu, ezemplu hanesan Universidade Nasionál Timor Lorosae (UNTL), máka kesi kontratu ho bolseiru sira, tanba asuntu hotu-hotu relasiona ho bolseiru katak sira nia prestasaun akadémika, monitorizasaun halao husi universidade.
“Ita koalia UNTL nian, ita bolseiru purvolta 50 ital ne’ebé mak estuda hela iha rai liur. Entaun bolseiru balu kontratu hahú kedas iha 2013- 2014. Iha ne’ebá, ami mós agora komesa hare’e ona hira mak tuir kontratu tenke termina ona hira mak seidauk, nia dehan.
Tanba dala barak kontratu kesi no fó espasu tan tinan ida atu sira bele kompleta, entaun ida ne’e mak FDCH atu hare’e katak bolseiru ne’ebé mak remata estudu tuir kontratu no bolseiru ne’ebé mak seidauk remata maibé kontratu liu ona.
Estajiária : Etelvina D. Sarmento
Asisten Editór : Pedro de Almeida
