Lafaek News—Embaixadór Repúblika China iha Timor Leste, Xiao Jiangou, deklara dezeju Timor Leste no Timor-oan hotu hein katak sei dezenvolve liután relasaun bilateral forte no prósperu sei metin ba nafatin ho Xina.
Xefe diplomata Xina iha Timor Leste hato’o asuntu ne’e iha serimonia atribui medalla husi Xefe Estadu José Ramos-Horta iha Palásiu Prezidensiál.
“Ohin ha’u hato’o despedida ba Prezidente Repúblika, ha’u hatete ba PR ha’u iha ne’e hanesan Embaixadór ba Timor Leste liu tinan haat ona, ha’u mak Embaixadór ne’ebé hela tinan barak liu iha Timor Leste, ha’u husik Timor Leste ha’u hakarak hato’o ha’u nia dezeju ba Timor Leste no Timoroan hotu, ha’u espera Timor Leste sei dezenvolve liu tan forte no prosperu, ha’u espera relasaun bilaterál Xina sei metin ba nafatin”, deklara Embaixadór Xina ba Timor Leste Xiao Jiangou ba jornalista, Sesta (16/12/2022).
Tuir Embaixadór ne’e, Xina dezenvolve relasaun di’ak ho Timoroan sira, tanba iha tinan haat liu ba hasoru mudansa barak no dezafiu barak hanesan Covid-19, inundasaun ne’ebé akontese iha tinan kotuk, iha kombate ida ne’e Hasoru Covid-19 no inundasau, Xina nia Embaixada iha Timor Leste sempre prontu fó ajuda Timor Leste.
“Hanesan Covid-19, Xina nasaun ne’ebé primeiru haruka ekipamentu médiku mai Timor Leste, Xina mós fornese vasina kuantidade boot, ko’alia kona-ba relasaun bilaterál entre nasaun rua ami halo buat barak ba Timor Leste, dala ida tan ha’u espera katak relasaun bilaterál sei hakat ba oin, Ko’alia kona-ba dezenvolvementu ekonómia Xina mós halo buat barak ba Timor Leste hanesan dezenvolvementu Portu Tibar, ami mós halo ona armajen boot rua ne’ebé sei ajuda Timor Leste atu rai foos no buat sira seluk tan.
Entretantu Embaixadór ne’e afirma, espera katak Embaixadór Xina ba Timor Leste Xiao Jiangou nia susesór sei halo buat barak ba Timor Leste atu implementa akordu hirak ne’ebé antes ne’e iha ona.
Iha okaziaun ne’e Prezidente Repúblika José Ramos Horta hatete ba Embaixadór Xina ba Timor Leste katak Xina ezerse papél importante iha kooperasaun entre nasaun sira, Prezidente Repúblika José Ramos Horta fó obrigadu ba Embaixadór kria ona relasaun di’ak tanba koñese di’ak Xefe Estadu antes Xefe Estadu sai Xefe Estadu.
Jornalista : Rita Moniz
Editór : Agapito de Deus
