Lafaek News—Ministru Asuntu Parlamentar no Komunikasaun (MAPKOMS), Francisco Martins da Costa Jerónimo, husu funsionarius ministériu ne’e nian husik hahalok ne’ebé la di’ak iha tinan tuan no kuda espiritu nasionalista iha tinan foun hodi servi povu no nasaun.
“Mensajen ba funsionariu sira haree ida ne’ebé mak di’ak tau ba oin, no ida ne’ebé mak ladi’ak husik iha tinan 2022 no hare ida ne’ebé diak kontinua hala’o ba tinan oin, hanesan ema dehan katak ai-fuan ne’ebé di’ak kuidadu didi’ak ba no ida ne’ebé nia sanak maran ona ladun di’ak tesi soe tiha,” hatete MAPKOMS Francisco Martins da Costa Pereira Jerónimo ba jornalista sira iha salaun Delta Nova, kuarta (21/12/2022)
Nia fundamenta, objetivu husi sorumutu ne’e mak atu halo avaliasaun anual ba funsionárius hotu kona-ba servisu periodu 2022 nian nune’e bele konsolida hanoin foun ba servisu 2023, tanba tinan tomak ida agora atu remata ona entaun MAPKOMS halo avaliasaun dezempeñu ida ba funsionariu sira to’o dirijente sira, husi Diretor Geral, Diretor Nasional, Inspetor no Diretores sira hotu nune’e bele kontinua servisu ho trankuilidade iha 2023.
“Ba oin ami tenke implementa saida mak ami halo ona atu nune’e halo metin liu tan Ministeriu i sira ne’ebé ladi’ak ami soe tau tiha ba kotuk hodi labele fo difikulta, i ami hare fali saida mak buat foun mak sei hala’o,”katak nia
Reportajen : Adolfina Soares
Editor. : Aniceto Dias
