Lafaek News—Xefe Suku Kaikoli postu administrativu Vera Kruz, Munisípiu Dili, Hipolito Marques Sarmento, fó hanoin governu atu harii drenajen nune’e evita inundasaun sobu bei-beik populasaun Kaikoli nia uma iha tempu udan.
“Oinsé governu atu prevene ka evita inundasaun iha komunidade nia leet bainhira tempu udan tanba kada tinan iha Dili laran liu-liu suku kaikoli sempre mosu inundasaun hodi estraga komunidade sira nia sasan barak,” dehan Hipolito ba Lafaek News iha Kaikoli Dili, foin lalais ne’e.
Hipolito deklara, ligadu preukupasaun populasaun Kaikoli, nu’udar autoridade foti kedan asaun hodi halo proposta ba ministériu relevante, maibé proposta ne’e rasik laiha konsiderasaun husi governu tanba too agora lauha rezultadu.
“Proposta barak mak ami hatama ona ba parte kompotente maibé iha ne’eba politiku mak barak liu entaun dalaruma proposta ne’ebé ami hatama ne’e sira bele so’e de’it ba lixu fatin,” nia esplika.
Autoridade lokal suku ne’e afirma, valeta ne’ebé eziste iha suku kaikoli dezde okupasaun Indonesia too ohin loron governu seidauk tau atensaun, ho ida ne’e husu ba VIII governu atu implementa ona drenajen iha suku Kaikoli núne’e komunidade sira la bele sai vítima tan ba inundasaun
Ikus lia lider komunitáriu ne’e akresenta, governu labele fó sala bei-beik ba povu sira ne’ebé seidauk iha konsiénsia soe lixu iha valeta, maibé governu tenke kria kondisaun no konsensializa komunidade sira no hadia kondisaun valeta inklui rekonstrui foun atu evita inundasaun iha tempu udan boot.
Jornalista : Orlando Magno
Editora : Nelya Barros
