Lafaek News—Komunidade uma kain hamutuk 50 husi aldeia Buka Fini, suku Bairru-Pite, postu administrativu Dom Aleixo, munisípiu Dili, hasai sira nia osan rasik sosa semente fui estrada hanesan alkatraun ho distansia metru Kuaze 25 husi estrada protokolu to’o area komunidade sira nian.
Joven sira kahur hela semente hamutuk ho rai-henek hodi fui ba rai hanesan alkatraun. foto LN JCS
Dionisio de Jesus Lospes nu’udar Responsavel no Organizadòr eventu voluntariu esplika, Inisiativa ne’e husi komunidade sira desde tinan 2014 bainhira estrada ne’eba, aldeia refere seidauk iha atu komunidade asesu, ikus mai populasaun sira koordena ho xefe aldea hodi aviza ba komunidade kada uma kain tau osan $. 5 sosa semente hodi fui ba estrada kuak ne’ebé uluk komunidade sira rasik mak kee atu nune’e inan-aman sira bele asesu liu-liu estudante sira bele ba eskola ho di’ak.
“Ita iha lista ne’ebè iha, uma hamutuk Lima-nulu resin mak ne’ebè iha aldeia ida ne’e Kontribui, semente hamutuk tolu-nulu resin, ho orsamentu hamutuk dolar atus ida rua nulu (120) ne’ebè ita halo ida ne’e iha faze Primeiru fui Estrada kuak no hada valeta inklui tembok penahan atu nune’e labele fò Impaktu ba ita nia maluk sira ne’ebe hela rai hun nian, sira nafatin kolabora oinsá haree hamutuk buat ne’ebè interese ema hotu nian,” Informa Dionsio ba Lafaek News iha Aldeia buka Fini , Sábadu (06/02/2020).
Dionisio haktuir, servisu ida ne’e laiha obrigatóriu, depende ba ema ida-idak nia konsiénsia no espíritu voluntarizmu, ema ne’ebé sente laran kma’an bele halo servisu ho voluntáriu.
“Esperansa ba ita komunidade rasik katak ita nafatin rona malu nafatin, serbisu sira ne’e, sei hakiak espiritu unidade, responsabilidade, no kolaborativu,” katak nia.
Entretantu Estrada ne’ebè mak fui ona ho semente kuaze metru 25, maibé antes ne’e juventude iha aldeia refere halo proposta no hetan rekoñesimentu husi xefe aldeia hodi submete ba Ministériu kompetente, maibé laiha rezultadu, tanba ne’e komunidade sira deside servisu hamutuk hodi halo rasik estrada ne’e ho sira nia osan rasik.
Jornalista : João da Costa Soares
Editora : Nelya Barros
