Kovalima –(Lafaek News)—Afonsius Mali idade 58, servisu lor-loron hili lata mamuk iha dalan ninin no valeta leet inklui ponte okos, rezultadu husi lata mamuk oan ida gradua husi Kristal no oan ida estudu iha UNTL semester 6 sosa kareta grand max no mehi atu sosa tan mikrolete ida hodi tula lata mamuk.
Afonsius Mali orijen husi munisípiu Bobonaru, ba da-daun hela iha aldeia Tabakolot suku Debos, Postu administrativu Suai munisípiu Kovalima, nia buka osan liu husi hili lata mamuk no tetu mós lata mamuk husi ema, Afonsius hahú atividade ne’e hahú iha tinan 2004 too agora, no iha 2020 konsege sosa karreta grand Max ida, inklui halo uma luxu iha nia knua Bobonaru, suporta oan feto ida eskola iha Universidade Kristal too finalize estudu.
Afoinsius Tuku hela lata mamauk iha nia uma bairru Pakistan.
“Ha’u lori osan ne’ebé ha’u hetan husi tetun kalen mamuk ne’e ha’u haruka ha’u nia oan ba eskola, Ha’u nia mane bo’ot eskola iha UNTL semsterPostu administrativu suai 6 ona nia hili fakuldade direitu, ida feto segundu ne’e gradua ona iha Kristal hili parteira, ida fali mane daruak la eskola nia hakarak ajuda ha’u buka lata mamuk, no feto ikun foin remata SMA agora naran sai ona iha UNTL, foin lalais 2020 liu ba foin sosa kareta kijan (grand Max) ida, tanba ha’u sente ha’u nia forsa mos komesa menus ona ne’ebé sosa karreta ne’e hodi ajuda hakman ha’u buka lata mamuk, ho karreta ne’e bele hakaman netik ha’u nia servisu ne’e ,” Afonsius haktuir ba Lafaek News iha nia rezidensia bairu Pakistan, Aldeia Tabakolot, Suku Debos, foin lalais ne’e.
Iha entrevista, Afonsius Mali haktuir, nia oan mane boot ba da-daun eskola iha Universidade Nasionál Timor Loro sa’e (UNTL) fakuldade direitu tama ona semester 6, no oan feto ida gradua ona iha Kristal iha area parteira.
Iha tinan 2004, bainhira Afonsius sei la’o de’it, loro-loron la tuur iha uma, loro-loron la’o hadulas sidade laran hodi hili lata mamuk hanesan Fanta, spirite no serveza hodi lori ba uma tuku belar halibur hamutuk, bainhira tetu hetan ona osan lori fali osan ne’e hodi sosa fali lata mamuk husi labarik sira ne’ebé hili mós kalen iha sidade laran, maibé nia rasik mós kontinua hili.
Atividade ne’e husi nia hakarak rasik, no laiha ema ruma mak obriga no fo inspirasaun, nia rasik hanoin husi nia laran katak lata mamuk mós iha valor ekonomia, maski la’o loron manas no udan laran, dala ruma ema hakribi nia, maibé Afonsius fiar an katak maske foer maibé importante bele hetan osan hodi harua oan sira eskola sai matenek hodi servi ba nasaun doben Timor Leste.
“Ha’u nia servisu loro-loron mak buka lata mamuk tetu husi ema no hili iha dalan ninin, servisu ida ne’e fo’er no ema barak mak lakohi halo servisu ida ne’e, maibe ha’u hakarak halo servisu ida ne’e tanba servisu ne’e foer, maibe hetan hotu osan ha’u tetu lata mamuk ne’e modal hahu ha’u hasai osan dolar atus haat,” Afonsius ko’alia.
Baihira nia fila husi atividade hili lata, la tuur dadas, maibé fakar sai kalen husi karon laran ba rai leten hodi foti fatuk tuku da-daun halo belar, dadeer tuku hitu hahú hili ona lata too loro kraik tuku lima, no tuku fali kalen husi tuku 6 lokraik too tuku 4 madrugada hafoin deskansa uituan too tuku 11 dadeer hariis no matabixu dadeer nian remata kontinua tuku fali kalen, too iha tempu ne’ebe lori kalen ba tetu iha Dili osan máximu bele too dolares rihun lima no mínimu dolare rihun ida.
“Lata ne’e ha’u sei halibur halo barak depois mak ha’u tula lori ba Dili ba hatama iha kompañia no osan sira ne’ebé ha’u hetan husi tetu kalen ne’e sorte di’ak bele hetan to dolar rihun lima karik sorti la di’ak dala ruma hetan de’it dolar rihun ida,” haktuir nia.
Ba da-daun Afonsius Mali iha ona hanoin atu sosa tan karreta mikrolete ida hodi ajuda nia tula kalen ne’ebé nia hili inklui tula kalen husi Kovalima ba Dili.
“Ha’u mos hanoin atu sosa mikrolete ne’e, tanba ha’u senti ha’u nia forsa mos komesa menus ona ne’ebé sosa mocrolete idahodi ajuda buka lata mamuk atu hakaman netik ha’u nia servisu ne’e,” servisu hanesan atan ne’e relata.
Ikus husi entrevista ne’e, Afonsius haktuir hakarak ka lakohi nia tenke hapara ona servisu hili kalen at ne’e, maibé antes hapara ba dahuluk nia sei eduka nia oan sira oinsá buka moris oinsá hili kalen no hatene oinsá tetu kalen hodi lori ba kompañia sosa.
Jornalista RCCT : Jhana Cardoso
Editor : Chamot nahac
