Lafaek News—Relasiona ho publikasaun media Lafaek News ho titulu Aman Luta Nain, Oan Atake Psikolójia Hela Lona Okos ne’ebe publika iha loron 5 fevereiru 2021, konsege fo hanoin ba estudante no juventude sira ne’ebe halibur Movimentu Universitariu Voluntarizmu Sura Ho Ha’u Iha Tempu Ukun An Hamutuk ho Jerasaun Patriota (JP) hala’o kedan asaun karidade liu husi apoiu material konstrusaun hodi taka Falviano nia uma ne’eb’e durante tina ruak taka de’it ho lona hodi tahan udan no anin.
Grupu Jerasaun Patriota no Movimentu Voluntarizmu Universitariu Sura Ho Ha’u Iha Tempu Ukun An taka hela kalen ba moras psikolojia Flaviano nia uma iha area kampun Baru suku Komoro.
“Ami husi jerasaun Patriota ho movimentu universitariu sura ho ha’u iha tempu ukun an nian halo kontribuisaun sosa material konstrusaun hanesan kalen tahan 32, besi ki’ik 14, besi boot 4 no material ki’ik sira seluk, hodi taka Flaviano nia uma tanbá durante ne’e nia hela de’it iha lona okos,” Reprezentante husi organizasaun Jerasaun Patriota ho Movimentu Universitariu Voluntarizmu Sura Ho Ha’u Iha Tempu Ukun An Herculano Asala Vicente ba lafaek news iha Flaviano nia rezidénsia kampun baru Komoro, Domingu 07/02/2021.
Reprezentante husi Movimentu Universitariu Sura Ho Ha’u IHa Tempu Ukun An ho Jerasaun Patriota, Herculano “Asala” Vicente, espresa, ajuda ba moras psikolojia Flaviano Pereira Jerónimo ne’e, tanbá papel tolu ne’ebé sira estuda iha universidade hanesan edukasaun, peskiza no dedikasaun.
Asala relata, kontribuisaun ne’ebé ho nia ekipa halo tuir buat ne’ebé sira iha bazeia ba Flaviano nia kondisaun real ne’ebé nia hasoru, maibé Jerasaun Patriota ho Ativu From Mahasiswa la’os ema riku mak halo solidariedade ne’e maluk Timor oan ne’e.
Reprezentante husi organizasaun rua ne’e katak, ba oin estudante sei kontinua peskiza, se iha peskiza ne’e baihira hetan tan maluk kbiit laek balu sira sei halibur malu halo kontribuisaun hodi ajuda ba kbiit laek sira.
“Iha futuru ita lakohi Timor-oan ida iha kotuk, maibé ita hakarak Timor-oan hotu tenke goza ukun rasik aan ida ne’e, Asala esplika.
Nia afirma, maske uluk ema balun lakohi ukun aan, tanba prosesu hotu sempre iha pro no kontra, tan ne’e labele fo sala ba sira ne’ebé uluk lakohi ukun aan, tanba liu husi prosesu pro no kontra mak Timor define nia objetivu.
“Ami iha moto ida dehan Sura Ho Ami Ba Timor, moto ida ne’e la’os ita atu gaba aan la’e maibé ita dehan ba nai ulun sira katak temi mós ami sidadaun Timor nia naran ba dezenvolvimentu iha rai laran,” argumenta reprezenta Jerasaun patriota ho Apoiu From Mahasiswa ne’e.
Iha fatin hanesan, Flaviano Pereira Jerónimo, espresa ho sentimentu orgullu no apresia ba maluk sira ninia neon hadomi tanbá bele tulun ona nia iha situasaun difisil nia laran.
“Ha’u sente kontente no orgullu tebes ba kolega sira nia kontribuisaun, tanba momentu ha’u iha situasaun difisil nia laran kolega sira husi Jerasaun patriota movimentu universitariu sira no halo kontribui hamutuk fo solidariedade ajuda material konstrusaun mai ha’u hodi hamahan ha’u husi udan no loron manas, tanbá sira haree liu husi ha’u nia aspetu umanu,” Flaviano apresia.
Flaviano fundamenta, nia mós hanesan ema kbiit laek ida, buat ne’ebé maluk sira ajuda ona sai progresu ne’ebé di’ak ba ninia nesesidade inklui sai ezemplu di’ak ba komunidade sira, karik ba oin hetan tan ema kbiit laek hanesan nia bele ajuda mós sira.
“Buat ne’ebé ita boot sira halo ne’e di’ak tebes tan ne’e ha’u prefere atu imi halo beibeik ba kbiik laek sira tuir saida mak imi iha tanbá Timor ne’e kuaze kbiit laek barak,” Flaviano rekomenda.
Observasaun ne’ebé lafaek news nota juventude ne’ebé hamahan iha Jerasaun Patrita ho Movimentu Universitariu Sura Ho Ha’u Iha Tempu Ukun ne’e taka kalen ne’ebé sira ajuda ba Flaviano nia uma ne’ebé durante ne’e taka de’it ho lona, no servisu ne’e sira hala’o durante loron rua hahú loron 06/02/2021 too loron 07/02/2021.
Jornalista : Orlando Magno
Editora : Nelya Barros
