Lafaek News—Prezidente Repúblika José Ramos-Horta rekomenda ba lider polítikus labele halo promesas falsus iha tempu kampaña husu hato’o programa ida ne’ebé bele ezekuta iha tinan liman nia laran.
“Ha’u fi’ar ké líder partidáriu sira sei fahe ho eleitoradu sira-nia programa ne’ebé sira atu ezekuta bainhira ba iha Parlamentu no ba karik governu, saida mak sira atu halo iha tinan lima mai ne’e, para hakle’an dame iha rai ne’e par hadia povu nia moris, ha’u sei hanesan observadór neútru, atentu, vizilante, ha’u sei akompaña permanente iha territóriu nasionál dezenvolvimentu kampaña ida-ne’e, ha’u sei informasoens ne’ebé permanente aktualizadu,”PR José Ramos-Horta hato’o mensajén ne’e iha kna’ar fatin Palasiu Prezidensiál Bairu-Pite, tersa ( 18/04/2023).
Xefe Estadu hateten, fiar lider sei la halo promesas falsus promesas ne’ebé haree demagozia promesas falsu, sira sei halo promesa ne’ebé sira ida-idak hatene bele ezekuta duni, tanba ida-idak hatene, kondisoens rai ida-ne’e nian emtermus de oinsá ita bele ezekuta programa ida ba tinan lima nia laran.
“Ne’e duni ha’u fi’ar, iha kampaña eleitoral ne’e, no tanba natureza duni difinisaun kampaña eleitoral partidu sira aprezenta aan ba eleitoradu no aprezenta programa, laiha partidu polítiku ida ké bele halo diskursu ne’ebé ita bolu demagóziku, atake pessoal ké bele enkoraja, insentiva violénsia, Prezidente-da-Repúlika sei rejista diskursu sira-ne’e hotu aktu sira-ne’e hotu no sei kanaliza ba Prokuradoria Jerál da Repúblika”, katak PR Ramos-Horta.
Tuir Xefe Estadu katak, iha situasaun ida-ne’e, povu atu ba urnas atu hili Parlamentu foun, liu husi Parlamentu governu foun ba tinan lima mai ne’e, hotu-hotu sei buka halo buat hotu-hotu ne’ebé hakle’an dame halo buat hotu-hotu sukat buat ne’ebé ko’alia labele hakle’an kanek ruma para bele fasilita ba oin diálogu interpartidáriu, entre polítiku, entre líder nune’e bele hetan governu ida forte ne’ebé iha tinan lima nia laran bele halo rai ne’e haksoit ba oin.
“Ha’u-nia liafuan mak ne’e de’it, ha’u-nia respeitu ba partidu sira hotu-hotu, laiha esessesaun, ba líder sira hotu-hotu. Boa sorte ba kada partidu ba líder sira. Agradese ba instituisoens sira-ne’ebé responsável ba ezekusaun téknika ezekusaun administrativa, lojístika buat hotu-hotu ne’ebé presiza halo para demokrasia la’o ba oin”, hakotu PR Horta.
Jornalista : Rita Moniz
Editór : Agapito de Deus