Lafaek News—Prezidente Repúblika José Ramos-Horta husu media fó informasaun alerta ba populasaun hotu iha Timor Leste labele hateke diretamente ba loron bainhira akontese eklipse solár iha loron 20 fulan Abríl .
“Kona-ba eventu natureza iha 20 Abríl ne’ebé ita hatene primeiravez akontese tinan 100 resin nia laran, fulan taka metin loron, hHa’u husu media sira nia kontribuisaun fó informasaun alerta ba ita nia labarik sira, joven, ferik katuas sira atu labele hateke direitamente ba loron, bainhira nakukun ita labele hateke”, hateten Prezidente Repúblika José Ramos-Horta bainhira hala’o média breafing kona-ba eklipse nian iha Palasiu Prezidensiál Bairu-Pite tersa (11/04/2023).
Xefe Estadu Ramos-Horta hateten, di’ak liu sientista sira, doutor sira hatete bainhira ne’e akontese fila kotuk, lalika haree fali tanbasá mak nia nakukun, saida mak taka loron ne’e.
“Ne’e duni lalika pániku, no labele haree fali saida mak taka hatene ona fulan mak taka, se la tuir ita nia rekomendasaun ema lubuk ida bele ba haree doutor matan at la hetan kura laiha tratamentu ba ida ne’e”, katak Prezidente Horta.
PR Ramos-Horta, rekoñese loos duni diretamente Timor Leste nia leten husi Com, Tutuala, Jaco, Lospalos akontese bele taka 100%, iha Dili 97% perigu tebe-tebes liu-liu ba joven, labarik ne’ebé la hatene labele haree.
“Ita fahe informasaun hatete labele hateke ba loron, tanba nia la taka 100% iha rai lalika temi nia naran tanba buat ne’e tékniku ne’e perigozu tebe-tebes, mezmu bai-bain ne’e iha loron manas iha rai utra violeta ne’e provoka kankru buat hotu-hotu tenke kuidadu ba ida ne’e,” xefe estadu ne’e sublina.
Jornalista : Rita Moniz
Editór : Agapito de Deus