Lafaek News—Halerik ne’ebé avó Manuel hasoru iha tinan barak ikus mai hetan duni tulun husi maluk sira ne’ebé iha fuan boot no sentimentu umanu ne’ebé as husi Xefe Aldeia Marobo suku Tokoluli no ekipa konjunta ne’ebé ldiera husi xefe gabinete diresaun nasionál, Superentendente Julia Gama.
Relasiona ho notísia Avo Manuel nian ne’ebé Lafaek News públika iha loron 12 Janeiru 2021, ho titulu Hela Fatin La Dignu no Laiha Ai-han Lor-loron, konsege hetan tulun husi Timor-oan sira ne’ebé iha sentimentu umanu as ba ema kbiit laek sira, maibe tulun ida ne’e mos seidauk bele responde, tanba ba oin sei laiha hela fatin ida permanente no ai-han ne’ebe saudavel ba avo Manuel.
Imajen parte karuk uma antes ne’ebe Avo Manuel hela, no iha imajen parte loos uma ne’ebe oferese husi Xefel Aldeia Marobo Suku Tokoluli, Foto : Lafaek News (LN).
Ekipa konjunta ne’ebé lidera hosi xefe Gabinte Diresaun Nasionál suprentendente Julia da Gama hatete, nu’udar xefe gabinete jéneru nian ne’ebé haree ba asuntu violénsia bazea ba jéneru, hosi ida ne’e fó kbi’it mós atu tau matan ema Kbi’it la’ek ne’ebé hetan violasaun no vulneravel.
“Asosiasaun Feto Jéneru (AFJ) ne’ebé kompostu hosi médiku balun,ita nia autoridade balun, konselu karismátiku no seluk tan ami nia visita ne’e, ha’u fila ba sei halo relatoriu kompletu ba ita komandante jéral no ba entidades balun ne’ebé relevante ho asuntu sosiál” dehan Xefe Gabinete Diresaun nasional suprentendente Julia da Gama iha Aldeia Marobo, suku tokoluli, Ermera Kinta semana ne’e.
Julia afirma, nune’e bainhira media ajusta situasaun avó Manuel nia ba média Lafaek news, nu’udar ema ne’ebé hakna’ar an ba asuntu refere imediatu halo relatóriu ba na’i ulun balun ne’ebé la bele mensiona naran, aumezmu tempu nia mós husu orientasaun servisu no hetan duni autorizasun hosi nia supeiór, tanba ne’e ho antuziasmu ohin bele mai halo vizita hodi hare avó nia kondisaun direta.
Ekipa kunjuntu Asosiasaun Feto Jéneru (AFJ fo tulun hela foos no mina ba avo Manuel iha nia hela fatin antes. foto : Lafaek news (LN).
Xefe Julia hatutan, tulun ne’ebé sira iha oinsá atu rekolla dadus hanesan servidór ba povu, servisu ba natureza komunidade nian, nune’e akumula sei relata ba na’i ulun sira tuir mai hodi hetan dezisaun. Maibé la taka dalan katak ema balun sei bele ajuda nia ne’ebé sira la bele indika, maibé husi ema hotu nia orasaun nafatin atu ema sira bele realiza sira nia mehi hodi ajuda avó ne’e.
“Ita hare ita nia avó ne’e mós kondisaun saúde la favóravel tanba ne’e ha’u ohin mai ho médiku balun atu bele hare mós nia kondisaun” dehan nia
Iha oportunidade vizita avó Manuel, Ekipa Asosiasaun Feto Jéneru (AFJ) mós halo karidade hanesan oferese Foos, mina no masmidar hodi tulun avó Manuel nia nesesidade lor-loron.
Iha sorin seluk OPS suku Tokoluli postu administrativu Railaku, munisípiu Ermera, Armenia Martins Tavares da Cruz, hatete relasiona ho situsaun Avó nian, nia halo ona enkntru konsellu suku ho autoridade lokál, levanta situsaun no husu ba autoridade lokál sira, tanba saida? avó tenke ba hela iha fatin hanesan ne’e no nia familia sira iha ka lae? no tuir esplikasaun xefe aldea katak nia nain rasik mak hakarak, hela besik ema nia lakohi, tan ne’e nia husik hela nia familia hodi ba hela iha mota laran.
“Ami sempre tenta no lori ona nia dadus ba iha MSSI hodi hetan ona nia direitu ba idozu nian no durante ne’e nia foti hela maibé nia osan nia gasta la tuir nia presiza entaun iha 2019 ami ho desizaun ida liu husi enkontru konsellu suku osan avó nia ami mak maneja, osan avó foti sorin de’it no nia restu xefe aldea mak kaer karik avó hakarak foti buat ruma iha loja ruma xefe aldea mak ba selu” dehan nia.
Ekipa Asosiasaun Feto Jéneru (AFJ hamutuk ho jornalista Lafaek News evakua Avo Manuel hela fatin provizoriu husi Xefe Aldeia. Foto Lafaek News (LN).
Entretantu, Xefe Aldea Marobo, suku Tokoluli, postu Railaku, munisípiu Ermera, Vicente Martins Soares, reforsa antes ne’e avó Manuel ho kondisaun ne’ebé di’ak no nia mai hela iha fatin hanesan ne’e, ida ne’e nia hakarak rasik, maibé ohin rona fali nia moras di’ak liu nia muda.
“Ha’u konfirmadu fó ha’u nia fatin no uma ba nia atu nia hela, maibé nafatin loke mós oportunidade ba governu, NGO ka kompañia balun karik hakarak ajuda a vontade,” dehan nia
Avó Manuel Hatete bainhira nia rona dehan atu muda, nia sente triste tebes tanba lakohi atu rona ema seluk ka familia ruma mur-mura nia.
“Di’ak liu ha’u hela iha ha’u nia to’os, ha’u lakoi ba hela ho familia ka hela ho komunidade balun han etu bikan ida rona lia ida ne’e ha’u lakoi” dehan Avó Mauel
Avó hatutan, agradese ba ujudu ne’ebé ekipa fó ba nia no nia sente karik iha umanidade hakarak oferese buat ruma hanesan fós no mina ruma ida ne’e natoon ona ba nia atu sasan kabun ne’ebé mak hamlaha.
Jornalista : Sabina B. Klau/Felisberto F. da Costa
Editora : Nelya Barros
