Lafaek News—Governu liu husi Ministériu Administarsaun Estatal (MAE) no Prezidente Aministrasaun Munisípiu Dili, Domingu (14/11/2021), realoka vítima Inundasaun 4 Abril iha kampu real madrid suku Manleuana ba hela iha uma kost.
Tuir vítima inundasaun 04 Abril, Paulo Oki, hatete, bainhira haloot hotu ona sasan no tula ba karreta, ekipa Sekretaria Estadu Protesaun Sivil imediatamente sobu lona ne’ebé durante vítima sira hela ba.
Ami tama iha ne’e sira husi protesaun sivil no care internasional máka mai monta tenda ne’e, agora ami muda sai ba kost lona sira ne’e sira mai sobu lori fila fali ba sira nia fatin, sira fó de’it lona mutin ne’ebé taka iha tenda leten nemak ami lori hotu ba kost,” dehan Vitima Inundasaun Paulo Oki ba jornalista lafaeknews, iha kampo real madrid, Domingu (14/11/2021).
Nune’e mós nia hato’o agradese ba governu tanba durante ne’e la abandona vítima afetadu sira to’o muda sira ba kost.
Ami agradese tebes ba estadu tanba durante tau matan mai ami to’o ohin loron mós sira la husik ami no lori ami to’o ba iha fatin seguru,” nia agardese.
Iha sorin seluk Xefe departamentu ba prevensaun mitigasaun dezastre (DPMD), diresaun nasionál jestaun risku dezastre (DNJRD), Martinho Fátima, esplika, tenda sira ne’ebé vítima inundasaun uza iha kampo real madrid bainhira realoka ona ba fatin seluk tenke sobu lori fali ba edifisiu sekretariu estadu protesaun sívil.
Tenda balun mamauk ona sobu ba tau iha armajen se iha tan akontesimentu hanesan dia 4 abril liu ba ne’e ita identifika fali fatin hodi asegura ba iha akonteseimentu tuir mai ne’ebé ita la oferese tenda ne’e ba vítima inundasaun sira, sira lori de’it lona ida ki’ik, tan ne’e protesaun sivil máka segura tenda ne’e,” heteten Xefe departaemetu ba prevensaun mitigasaun dezastre.
Iha fatin hanesan vítima inundasaun Joel de Jesus sente komfuzaun bainhira Governu muda sira ba iha fatin koz, tanba fatin koz laos fatin neebe gratuita ba ema atu hela, maibé PAM DiliG Guilhemina Filomena Saldanha Ribeiro buat hotu governu nafatin fasilita.
Ami sente diak uituan bainhira governu deside muda ami ba fatin koz, estadu nafatin tau matan mai ami ka lae? Ida nee mak halo ami duvidas boot tanba ema nia uma kos la’os fatin atu hela gratuita,” dehan refuzuadu Joel ba lafaek news iha kampu Real Madrid Manleuana Dili.
Joel relata, bainhira estadu foti desizaun muda ami ba fatin seguru ona maibe sira nafatin komfuzaun ba nesesidade uma laran nian.
Ami husu ba governu atu tau matan nafatin mai ami, tanba fatin koz presiza fasilidade hanesan bee, hahan, pulsa eletrisidade tanba ami nain neen hela iha kuartu rua,” nia deklara.
Hatan ba preokupasaun nee, prezidente Autoridade Munisipiu (PAM), Dili Guilhermina Filomena Saldanha Ribeiro esplika, refuziadu sira labele duvidadas bainhira hela iha koz tanba governu nafatin konsidera no fasilita sira.
Kona-ba nesesidade uma laran imi labele duvidas tanba tanba governu liu husi administrasaun estatal no osan neebe iha autoridade munisipiu Dili mak sei selu koz sira nee durante tempu neebe sira sei hela,” PAM Dili Guilhemina sublina.
PAM Dili Guilhemina argumenta, Refuziadu sira nia direitu husi protesaun sivil no mos Ministeriu Solidarieade Sosial Inkluzaun nia nee nafatin lao iha prosesu nia laran tanba nee husu refuziadu sira atu hela iha kos hodi hein sira ania direitu.
Observasaun jornalista lafaek news iha terrenu nota, vítima inundasaun ida-idak halot sira nia sasan no tula ba karreta ne’ebé prepara husi prezidente administrasaun munisipiu Dili hodi tula ba kost, husik hela tenda ne’ebé durante sira uza iha iha kampo real madrid, nune’e ekipa husi protesaun sivil sobu tutir tenda ne’ebé mamuk.
Jornalista : Pedro de Almeida/Orlando Magno
Editor : Agapito de Deus
