Lafaek News— Koordenadór Forsa-Tarefa ba Prevensaun no Mitigasaun Surtu Covid-19 iha Timor Leste, Sentru Integradu Jestaun Krijes, Sala Situasaun (CIGC-SS) Rui Maria de Araújo informa, ema ne’ebé simu kompletu ona vasina doze daruak sirkula livre importante kumpri regras atu prevene Covid-19.
“Ema ne’ebé simu ona vasina doze daruak hasoru virus SARS-CoV-2 – naran vasina ida, husi hirak ne’ebé rekoñesidu husi OMS bele ona sirkula livremente tama ka sai serka sanitária, la presiza hetan autorizasaun esepsionál SIJK, maibé nafatin kumpri regra prevensaun no ijiéne individual, ne’ebé Governu hatu’ur ona, atu prevene moras Covid-19 da’et ba mai,” dehan Koordenadór Rui Maria de Araújo, liu husi komunikadu imprensa, sabadu (17/07/2021).
Nune’e mós koordenadór relata kazu detetadu foun dia (17/07), hamutuk 51 (iha Dili 37, munisípiu seluk hamutuk 14), mane 26, feto 25 hirak ho idade 12:1, ho idade entre tinan 12-59 nain 50 (98,0%); ho idade 60:0, husi kazu ne’e 1,9% máka sintomátiku.
Nia hatutan, kazu rekuperadu hamutuk 52, kazu ativu iha izolamentu 809, kazu konfirmadu kumulativu iha17 de Jullu 2021 (sura husi 21 Marsu 2020): 10.100.
Enkuantu husi izolamentu Vera Cruz halo tratamentu ba kazu detetadu nain 15. Iha área obstetrisia nain 4, iha medisina interna nain 8, iha sirurjia nain 3.
“Sira nain 4 iha obstetrisia, kategoria leve (mild) hotu, nain 8 iha medisina interna, 2 grave uza ventilador, nain 2 moderadu, nain 4 leve (mild), nain 3 iha sirurjia, kategoria leve (mild) hotu,” tenik nia.
Jornalista : Sandi Belo
Asisten Editór : Pedro de Almeida
