Lafaek News—Ministériu Finansas (MF) realiza ona pagamentu izensaun propinas ba estudante-sira iha Ensinu Superiór ho montante millaun $5,6.

Totál númeru estudante Ensinu Superiór ne’ebé mak hetan benefísiu hamutuk estudante 64.619 iha Instituisaun Ensinu Superiór (IES) hamutuk sanulu-resin-ualu (18).

“Pagamentu izensaun propinas estudante IES ne’e, halo hafoin Ministériu Ensinu Superiór Siénsia no Kultura (MESSK), konkorda hodi halo alterasaun ba Memorandu Entendimentu (MoU) ho IES sira kona-ba propinas ba estudante sira,” relata husi Ministériu Finansas (MF) iha komunikadu imprensa ne’ebé lafaeknews asesu iha loron sesta (16/07/2021).

Enkuantu detalla IES públiku no privadu sira ne’ebé hetan pagamentu mak hanesan tuir-mai ne’e: Dili Institute of Technology (DIT); East Timor Coffee Institute (ETCI); Institute of Business (IOB); Instituto Boaventura Timor-Leste (IBTL); Instituto Católico Formação de Professores (ICFP); Instituto Ciências da Saúde (ICS); Instituto de Ciências Religiosas (ICR); Instituto Filosófico S. Francisco de Sales (IFFS); Instituto Politécnico de Betano (IPB); Instituto Profissional de Canossa (IPDC); Instituto S. João de Brito (ISJB); Instituto Superior Cristal (ISC); Instituto Superior de Filosofia e Teologia (ISFIT); João Saldanha Institute (JSI); Universidade de Díli (UNDIL); Universidade de Paz (UNPAZ); Universidade Nacional de Timor Lorosa’e (UNTL); no ikus liu mak Universidade Oriental Timor Lorosa’e (UNITAL).

Iha komunikadu ne’e hatete, relasiona ho subsídiu internet ba estudante ensinu superiór sira, MESSK sei kompleta rekezitus ba Operadór Telekomunikasaun sira hanesan Timor Telecom, Telemor no Telkomcel hodi submete filafali mai MF iha tempu badak nia laran hodi verifika molok realiza pagamentu.

Jornalista         : João da Costa Soares
Asisten Editór  : Pedro de Almeida