Lafaek News–Polisia Republik Indonesia kaptura membru Grupu Arte Marsiais PSHT husi Timor Leste, ne’ebe hakat husi dalan ilegal, Kinta (19/08/2021) re-entrega diretamente ba Unidade Patrollamentu Fronteira (UPF).
Komandante UPF Superintendente Polisia, Euclides Belo informa, kinta 19/08/2021 nasaun viziñu liu husi imigrasaun no Kapoldres Indonesia kaptura sidadaun Timor ne’ebe envolve aan iha grupu arte marsiais PSHT hamutuk ema nain 352, tanba liu husi dalan ilegal ba graduasaun (Sae Sabuk) iha indonesia.
“Ami simu ita nia sidadaun sira iha indonesia nia rai tanba liu husi imigrasaun, UPF no PNTL garante seguransa nunee mos ami kumpre regra no prosedimentu protokolu neebe agora estabelese hela iha ita nia rain,” dehan Komandante UPF Euclides ba jornalista iha feonteira Mota-ain Bobonaru, kinta 19/08/2021.
Komandante UPF Euclides esplika, Parte imigrasaun halo ona verifikasaun ba sira nia identidade maibe sira nee hotu UPF sei entrega ba sala situasaun Sentru Integradu Jestaun Krize central depois transporta ba Dili hatama iha kuarentina neebe sala situasaun prepara ona.
“Aleinde ne’e ita mos garante seguransa ba estudante hamutuk 109 ne’ebe estudante universidade iha indonesia, tan de’it sira nia pasaporte no fixa mate entaun sira deside fila mai iha Timor, maibe sira ne’e hotu inklui mos maluk sira ne’ebe atu ba servisu iha nasaun estranjeiru, tanba ema nia nasaun mos afeta hela situasaun pandemia global entaun sira la jadi ba servisu,” nia deklara.
Euclides afirma, Komandu Polisia Nasional Timor-Leste liu husi Unidade Patrollamentu Frinteira (UPF), servisu no kordenada ho perte linha fronteira espesialmente Sentru integradu Mota-ain sira servisu hamutuk.
Iha fatin hanesan, Segundu Adjuntu Operasaun Estadu Maior Koordenador Sala Situasaun, Superintendente Marcos Siqueira Nunes relata, membru GAM sira ne’e sei lori ba karentina iha Dili., tanba karantina Maliana laiha ona espasu.
“Ita nafatin haree no kontrala sira maibe importante mak sira tenke kumpre saida mak parte saude haruka, tanba seguransa sei la husik membru GAM atu halo tuir sira nia hakarak no sira mos ohin hatan ona atu lopera ho parte saude bainhira hela iha kuarentina,” marcos realsa.
Entretantu tuir observasaun jornalista Lafaek Newsiha terenu, membru GAM ne’ebe ba sae sintu iha indonesia maioria joven feto-mane, ho ferik-katuas, inklui xefe aldeia ida husi Balibo, professor EBF ida ho inisial AP husi Bobonaru Odelgomon no Polisia Ajente Xefe ida nia oan nain ida husi Likisa inklui Veteranus oitu a katorze ida ho inisial BG ne’ebe simu osan veteranus iha tinan 2018 husi munisipiu Bobonaru.
Jornalista :Orlando Magno
Editor : Agapito de Deus
