Lafaek News (Bobonaru)–Komandante Unidade Patrollamentu Fronteira (UPF), Superintendente Polisia Euclides Belo informa, sente triste bainhira sidadaun Timor tama sai fronteira liu dalan ilegal, maine bainhira GAM repete tan hahalok ne’e sei hasoru forsa segransa.
“Hafoin kumpre kuarentina durante loron 14 imi sei halo presta deklarasaun prosesu tuir prosedimentu ne’ebe lei vigora ona no mos husu imi labele atu repete tan se imi repete tan hasoru ami ne’e buat seluk fali ona tan beibeik ona,” Euclides espresa iha fronteira mota ain Bobonaru, kinta 19/09/2021.
Hodi dehan, ohin iha ema nia rai autoridade seguransa indonesia entrega imi mai estadu Timor Leste, sente triste no fuan tanis, tanba tama sai fronteira liu dalan ilegal iha situasaun hanesan ne’e.
Komandante UPF esplika tan, hanesan maun no aman ida fo konfiansa ba membru grupu arte martial sira atu sai diplomata ida hodi fo hatene ba kolega sira seluk katak bainhira ba Indonesia liu husi dalan legal la’os liu fali iha ai laran fuik no fatuk let.
“Husu ita boot sira nia organizasaun maske sira la rekoñese ita boot sira maibe ami nafatin komunika ho sira atu organiza ita boot sira lao tuir prosedimentu KRAM nian, maibe laos tuir imi nia hakarak deit,” Euclides relata.
Nia rekomenda, sidadaun ida labele koko atu viola lei tan ne’e UPF sei entrega membru GAM PSHT hamutuk 352 ba Sentru Integradu Jestaun Krize lori ba Dili, maibe nia lakohi rona membru GAM ne’e halibur halo barollu, kontra regras izolamentu no mos nia lakohi rona Membru GAM sira ne’e kontra pesoal saude sira iha izolamentu.
Euclides rekoñese, husi ohin ba oin nia (Euclides), mak sei komandante Unidade Patrollamentu Fronteira tuir lei PNTL artigu 33 no forsa sira ne’ebe agora iha ne’e apoiu UPF iha fronteira entre Timor-Leste ho Indonesia.
Entretantu observasaun lafaek news notaiha terenu komandante sei nafatin orienta membru UPF sira atu halo patrollamentu iha linha fronteira terrestre hodi garante seguransa iha fronteira no movimentasaun ilegal.
Jornalista : Orlando Magno
Editor : Agapito de Deus
