LafaekNews – Polisía Nasionál Timor-Leste(PNTL) liu husi departamentu Unidade Patrullamentu Fronteira(UPF) kaptura pesoal Konsellu Polisiamentu Komunitária (KPK) ida ne’ebé tenta hakat illegal liu husi fronteira entre Timor-Leste ba Indonézia
Komandante UPF, Superintendente, Euclides Belo, informa, Ohin tuku 6 dader ne’e membru sekreta husi UPF, halo vizilansia iha pilar 4 Mota-Ain nian mak kaptura membru Konsellu Polisiamentu Komunitária (KPK), ida ne’ebe ho intensaun atu liu dala ilegal ba Indonézia.
“Ohin dader ita nia ekipa Sekreta UPF kaptura ita nia sidadaun ida iha fronteira Mota-Ain Batugade, Bobonaru,” dehan Komandante UPF Superintendente, Euclides Belo, ba LafaekNews, liu husi via telefone, Domingu 05/12/2021.
Euclides, hatutan, Sidadaun ne’e orijem husi Laclubar-Manatuto ho naran inisial AMS, tinan 52, no nia nu’udar membru Konsellu Polisiamentu Komunitaria (KPK) iha Suku Bebonuk, Postu Administrativu Dom Aleixo, Munisipíu Dili.
Enkuantu paradeiru membru Konsellu Polisiamentu Komunitária (KPK) ne’e agora iha kuartel UPF halo hotu identifikasaun mak entrega ba Postu Polisía Batugade, Komando, Bobonaro nian hodi tuir prosesu legal, hakotu, Euclides.
Jornalista :Orlando Magno
Asisten editor: Egidio Nono
