Lafaek News–Reprezentante Komunidade Kaisidu munisípiu Baukau, sesta (08/10/2021), hasoru malu ho Primeiru Ministru Taur Matan Ruak hodi ko’alia kona-ba programa dezenvolvimentu semente iha Kaisidu, tanba populasaun sira lakohi simu kompania atu produz semente.
Prezidente Konsellu Veteranus Dili Salustiano Belo Uro hateten, ohin sira hasoru Primeiru Ministru ho razaun komuidade sira hasoru difikuldade iha área produsaun semente,kestaun ne’e aprezenta iha loron 15 fulan setembru 2018, sira uma lisan 38 iha Kaisidu hala’o enkontru hamutuk hodi tenta hasoru orgaun soberanu sira iha nasaun ida ne’e.
Ami husu karik realiza duni projetu ne’e governu estadu Timor-Leste tenke husu legalidade kompaña nian, tanba kompaña sai hanesan investór ida nia mai atu investe ita nia rai, ita nia governu tenke hatama fali osan 64 pursentu, emprezáriu ida ne’e mai ho 36 pursentu, ida ne’e mak sai ami dúvida,” dehan Prezidente Konsellu Veteranu Dili, Salustiano Belo Uro iha Rezidénsia PM Faról Dili.
Nia informa, kompañia ida bainhira atu tama iha fatin ida tenke respeita kultura ne’ebé iha, tanba ida ne’e konsagra ona iha konstituisaun artigu 59 aliña 5, katak tenke respeita kultura maibé, realidade kompañia tama iha nebá ke’e rai arbiru nunka obedese ba kultura nain sira.
Ami hakarak bele hasai fatuk ne’ebá, maibé planu ba fábrika ne’e tenke muda, segundu ponte kais ami la aseita tau iha nebá tanba iha área ne’e, área protezidu, neduni iha área nebá uma lisan 38 ne’e ninia direitu hotu tanba ne’e ami proteze fatin nebá ami sei la fó ba ema ida,” informa Nia.
Iha fatin hanesan portavoz Intelektual Kaisidu oan Marcelino da Costa Belo hateten, laos lakoi atu halo dezenvolvimentu maibé kompaña ida tama tenke respeitu fatin ne’ebé protezidu tenke proteze.
La’os dehan ami lakohi dezenvolvimentu iha ita nia rai, maibé kompaña ida tama tenke respeitu fatin ne’ebé protezidu, entaun ami laos mai iha ne’e atu bandu dezenvolvimentu maibé tenke envolve intelektual Kaisidu oan, kultura nain no povu halo debate didiak hodi determina fatin ne’ebé mak governu uza, no fatin ne’ebé mak labele,” hakotu Marcelino da Cota Belo.
Nia informa, sira prontu fó fali área Waiono ba iha governu no estadu hodi harii fila fali turizmu kulturál iha fatin nebá, neduni resposta primeiru ministru nia ohin katak tenke fila ba halo komunikasaun ne’ebé diak hodi bele rezolve problema ne’e nudar ema Timor oan.
Jornalista : Juvita dos Santos
Editór : Agapito de Deus
